Shillong, Jymmang 25
Ka jingïaid lynti ka kynhun ïalehkai ka Jylla ha ka Swami Vivekananda U-20 Men’s National Football Championship 2025, ka la poi noh sha kaba kut hadien ba ka la mad ïa ka jingshah rem da 4-0 kol ha ka Mizoram ha ka semi final kaba la long ha ka Sngi U Blei ha Narainpur, Chhattisgarh.
Kane ka nam jop ka Mizoram ka la wan urlong lyngba ki kol na u Mesak C Lalrinngheta, Mesak C Lalrinngheta, Dantes K Lalhriatpuia bad u F. Vanlalchhanchhuaha na ka bynta ban jam sha ka final.
Kumba ka paw kane ka jingïakhun ka la long kaba itynnad bad kaba ïakhaid bha ha kaba sdang. Ka Mizoram ka la pynkhih jar nyngkong eh ha ka minit kaba 28 lyngba u Lalrinngheta. Wat la ki rangïalehkai ka Meghalaya ki la pyrshah ban ïakhun tyngeh, hynrei kim shym la lah ban pynphai haduh kaba kut jong ka kylla step.
Hadien ba la bteng ïa ka jingïakhun jong ka kylla miet, u Lalrinngheta u la thep biang ïa ka kol ba ar ha ka minit kaba 76. Ha shwa ban wai kane ka kynhun ka la thep biang sa ar kol lyngba u Lalhriatpuia (83) bad u F. Vanlalchhanchhuaha (90+2) na ka bynta ban ïoh jingjop shi syndon.
Lah ban pynkynmaw ka Meghalaya hapoh ka jingïalam u Bah Bobby L Nongbet (football coach) ka la jop baroh lai sien ha ki jingïalehkai jong ka Group-A ha kaba ka la pynliem ïa ka Rajasthan (4-0 kol), kumjuh ïa ka Kerala (2-1 kol) bad ïa ka Bihar (7-0 kol). Ha ka quarter final ka la jop ïa ka Karnataka.
Haba phai sha kawei pat ka jingïakhun semi final kaba la long kham ha shwa, ka Delhi ka la pynliem noh ïa ka Sports Authority of India (SAI) da 4-0 kol. Kane ka la wan urlong lyngba ki kol ba la thep da u Arman Ahmad (15), Sankhil Darpol Tuishang (50), Jajo Prashan (54) bad u Aditya Adhikari (65).
Te, kumta ka Mizoram kan ïakynduh final pyrshah ïa ka Delhi.
