Delhi, Jymmang 25
Sa tang shi bnai dang sah ban rakhe ïa ka International Day of Yoga (IDY) kaba 11, u Myntri Rangbahduh Narendra Modi, ha ka bynta ba 122 jong ka Mann Ki Baat, u la kyrpad ïa ki briew kylleng ka pyrthei ban pdiang ïa ka yoga na ka bynta ka bha ka miat ba pura bad ka rukom im ba seisoh.
U Myntri Rangbahduh u la ïohi ba ka jingshit rhem ïa ka sngi Yoga ka dang ïai bteng ban kiew ha ri India bad ha ka pyrthei. “Naduh ba la sdang ïa ka ‘Sngi Yoga’ ha ka 21 tarik Jylliew 2015, ka jingkhring sha ka, ka nang ïai kiew. Ha kane ka kynti ruh, ka jingkmen bad jingshit rhem hapdeng ki briew ha kylleng ka pyrthei ha kaba ïadei bad ka Sngi Yoga ka paw bha,” u la pynpaw. U Myntri Rangbahduh u la kyntu shuh shuh ïa ki briew ba kin pyrkhat thymmai ban rakhe ïa kane ka sngi. Naduh ba la sdang ïa ki jingïasnoh kti na ka bynta ka Yoga haduh ka jingleh yoga ha ki jaka ba pawnam, ki briew ki pynkylla ïa ka IDY sha ka jingïakhih kaba thymmai bad kaba kynthup lang ïa baroh.
Ha ka jingai jingkren jong u, u Myntri Rangbahduh, u la ïaroh ïa ki sienjam jong ka Andhra Pradesh, ha kaba la sdang ïa ka Yog Andhra Abhiyan da ka jingthmu ban kyntiew ïa ka kolshor yoga kaba khlaiñ ha ka jylla. Ka campaign ka angnud ban tei ïa ka thup jong ki 10 lak ngut ki briew ba leh yoga man ka por, kaba ai nuksa kumno ki jylla ki lah ban ïalam na khmat ha ka jingkylla ha ka koit ka khiah. U la ïasam ruh ïa ka jingkmen jong u ban ïadon bynta lang ha ka jingrakhe IDY mynta u snem ha Visakhapatnam, da kaba ban jur ïa ka jingdonkam jong ka yoga ha ka roi ka par jong ki briew shimet bad jong ka ri.
Haba ai khublei ïa ka jingkiew ka jingïashim bynta jong ki kompeni ha ka yoga, u Myntri Rangbahduh u la ong ba, “Ki kompeni jong ngi kim sahdien ha kane. Don ki jaka treikam kiba la buh kyrpang ïa ka jaka ban leh yoga ha ki ophis jong ki. Don ki start-up kiba la buh ïa ki ‘por leh yoga ha jaka trei’.” Kane, u la ong, ka dei ka dak kaba bha kumno ki riew shimet ki noh synñiang sha ka jingïakhih na ka bynta ka koit ka khiah jong ka ri.
Ban kynmaw burom ïa ki shiphew snem jong ka jingrakhe ïa ka sngi Yoga bad ban rakhe ïa ka bynta kaba 11 jong ka IDY, ka tnat Ayush ka la pynkhreh 10 tylli ki prokram ba kyrpang. Kine ki sienjam ki thmu ban pynïar ïa ka jingpoi bad jingïadei jong ka yoga ha ki jaka bapher bapher jong ka imlang sahlang bad ka kam.
Napdeng kine, ka Yoga Sangam ka la dep ban sakhi palat 6,000 tylli ki kynhun kiba la pynrung kyrteng ban pynlong ïa ki prokram, kaba pynlong ïa ka kum kawei na ki jingïalang ba heh tam na ka bynta ka koit ka khiah ba la pynlong da ka imlang sahlang ha ka histori jong ka ri. Ka ‘Yoga Unplugged’ kaba pynleit jingmut ha ki samla ka nang kiew stet bha, ha kaba ki jaka treikam kiba pawnam ki wan shakhmat ban pynshlur ïa ka pateng ban wan jong ki nongleh yoga. Katba ka Samyoga-ka sienjam kaba thymmai-ka ïaleh ban pynïasoh ïa ka yoga ha ki rukom ai jingsumar ba kongsan ba kynthup ïa ka Ayurveda, ka Homoeopathy, ka Unani, ka Siddha, ka Naturopathy, bad ka Sowa Rigpa.
Kumba la ong u Narendra Modi, “Ka Yoga kan pynkylla ïa ka rukom im jong phi.” La kyntu ïa ki nongshong shnong, ki kompeni, ki jaka treikam, bad ki samla ban rakhe ïa ka IDY 2025 ha ki rukom kiba don jingmut bad kiba thymmai, ban pynthikna ba ka yoga kan long ka bynta kaba kongsan jong ka jingim ba man ka sngi.
Ka tnat Ayush ka khot sngewbha ïa baroh ban long shi bynta jong kane ka jingrakhe kaba pynkylla dur. Katba ngi dang jan ïa ka 21 tarik u Jylliew, ka khubor ka long kaba shai: Ka Yoga kam dei tang ka jingleh-ka dei ka jingkhih na ka bynta ka koit ka khiah jong ka ri, ka jingsuk mynsiem, bad ka bha ka miat ha ka pyrthei.
