Shillong, Jymmang 25
Ka 3rd YAI North East Regatta 2025 ka la sdang da ki jingïakob ñiah lieng ha ka pung Umïam khnang ban kyntiew ïa ki sap jong ki samla.
La pynlong ïa kane ka jingïakob da ka Umïam Sailing Club bad ka UDAY Sailing Foundation. Kane ka jingïakob ñiah lieng ka la ïoh jingkyrshan na ka Yachting Association of India bad na ka International 420 Class Association of India.
Kane ka jingïakob ka dei kawei na ki lympung ba paw jong ka India ha ka Junior National Ranking Regatta bad kan kut haduh ka 29 tarik mynta u bnai, ha kaba yn pyni ïa ki sap ba tbit jong ki samla nongñiah lieng jong ka ri India. Ki jingïalehkai ha kane ka jingïakob na ka bynta ban jied ïa ki nongïa-lehkai ki ban mihkhmat ïa ka ri India sha ka Asian Games ka ban long ha u snem 2026.
Ha ka ai jingkren ha kane ka sngi, u Lt Gen TSA Narayanan, AVSM, Vice President jong ka YAI, u la pynpaw ïa ka jingsngewnguh ïa ka jingkiew stet jong kane ka jingïakob ñiah lieng ha kane ka thaiñ, da kaba ong, “Ka jingpyrkhat ban pynlong ïa ki jingïakob kiba kongsan, hynrei ki nongñiah lieng ki la buh ïa ka nongrim kaba thymmai ha ka ri India.” U la pynpaw ruh ka jingkmen ba ka Umiam Sailing Club ka la pynrung ïa 13 ngut ki nongñiah lieng kaba pynlong ïa ka kum ka kynhun kaba lai bad ba heh tam.
Ha kawei pat ka liang u Dr Vijay Kumar D. (IAS), Commissioner & Secretary ka tnat jngoh kai bad uba long u Chairman of Umïam Sailing Club, u la pynpaw ba ka jingthmu jong ka tnad jngohkai ka long ban pynïahap ïa ka mariang, ka jingpynneh pynsah jong ka kam jngohkai pyrthei, ryngkat bad ki lad kamai, u la kren shaphang ka jingthmu kaba bniah na ka bynta ka pung Umïam khnang ba kan long ka jaka na ka bynta ki nongjngohkai pyr-thei, ki jingpynbyrngia bad kiwei kiwei.
“Kumta ngi la buh kyrpang ïa kawei ka jaka hangne kum ka jaka ïakob ñiah lieng namar ka Meghalaya kan pynlong ïa ka National Games ha u snem 2027, bad ka Umiam kan long ka jaka kaba kaba biang eh na ka bynta ki jingïalehkai kieng lieng.”
