New Delhi, Jymmang 25
Ka Secretary ka tnad ka koit ka khiah ka Sorkar Pdeng ha ka Sngi Saitjaiñ ka la khmih bniah ïa ka kam haba ïadei bad ki nongpang COVID-19 ha ryngkat ka jingdonlang u Secretary ka tnad Health Research (DHR) & Director General, Indian Council of Medical Research (ICMR), DGHS, National Centre for Disease Control (NCDC) bad kiwei-kiwei.
Ka kyrwoh ka ong ba la ïoh jingtip shaphang katto-katne ki nongpang COVID-19 na ki Jylla kum ka Kerala, Tamil Nadu, Maharashtra, Karnataka bad kiwei-kiwei.
Lah ban kdew ba ka don ka rukom peitngor kaba khlaiñ hapoh ka ri baroh kawei na bynta ki jingpang kiba ïadei bad ka jingpynhiar mynsiem ba kynthup ïa ka COVID-19 lyngba ka Integrated Disease Surveillance Programme (IDSP) bad ka rynsan peitngor jong ka ICMR ha kylleng ka ri.
Ha kajuh ka por, la ïohi ba bun na kine ki jingpang ki long kiba malu-mala bad kiba don hapoh ka jingsumar ha ïing.
Nalor kane, ki don ruh katto-katne ki khubor ha kaba ïadei bad ka jingkiew ha ka jingdon ki nongpang COVID-19 ha Singapore, Hong Kong bad kiwei-kiwei ki ri ha kine ki por ba la dep.
Shuh shuh la pyntikna na ki jaka kyrpang jong ka National IHR ba ym don dak eiei ba ki jait jingpang kiba don ki kham lah ban saphriang ne pynmih ïa ka jingpang kaba kham jur haba ïanujor bad ki jait jingpang kiba la don mynshuwa.
Na ka liang ka tnad ka koit ka khiah ka Sorkar Pdeng ka dang peitngor bad lyngba ki kynhun bapher-bapher jong ka, ka dang buddien ïa ka jinglong-jingman.
