Ki kam sniew kam smeh ki la nangjur na kawei ka sngi sha kawei pat. Lada ngi phai ha ki kam tuh kam thiem, ka jingkyrni jong u drok bad kiwei kiwei ki kam sniew, ngi ïohi ba kata ka jingsngewlem ne ka jingpyrkhat ba bha kam don shuh. Kat nangmih ki sngi ki jingsniew ruh ki nangjur. Shano kane kan ïalam khamtam ïa kito kiba dang rit ka rta. Haduh katno kata ka jingshngaiñ ha ka leit ka wan ne ha ki ïing ki sem kan dang don namar kat shaba phai tang ki jingsniew suda. Balei haduh katne bad kiei ki daw jong kine kiei kiei baroh. Shano kata ka jingïatip lem, ka akor ka jingïa burom ka la jah.
Dang ha kine ki sngi, ngi la sakhi sa kawei na ki kam sniew kaba ym pat ju jia koit hangne hapoh ka Ri-Khasi ka jong ngi, ha kaba katkum ka dur khih lyngba ka kor CCTV kaba la saphriang, la ïohi ba uwei u briew u bym don shuh ka raiñ ka rem ne ka jingïatip lem ne ban shu ong noh uba la don ka mynsiem mrad, uba la nud syndon ban buddien nadien kawei ka khynnah skul bad ban khyllied ïa ka skad bad ban shondur syndon. Kane ka jingjia, ym tang ba ka la pynbitar ne pynkthang mynsiem hynrei ka la wanrah ruh ïa ka jingshong syier ha ka jingmut jingpyrkhat jong ki kmie ki kpa na ka bynta ki khun kynthei. Kum ïa une u briew ka tnat pulit ka dei ban thwet bad kem bad ban pynshitom da kaba tyngeh khnang ba kum kine ki jingjia kiba pynjah burom ïa ka longrynïeng jong ki kynthei kan ym jia shuh bad ruh ba kan long ka nuksa ïa kiwei ba kin ym pyrkhat shuh tang shiphew sien hynrei da ki hajar sien ban leh ïa kum kine ki kam pohjait pohrati.
Ngim ju poi pyrkhat satia ba kum kine ki jingjia ruh kin wan jia ha ri Khasi. Hooid ïa ki jingjia jong ka jingshah leh donbor, shah thombor ïa ka longrynïeng jong ki kynthei la ju sakhi ha ki jylla rithor. Ym poi pyrkhat ba kum kane kan wan jia ruh ha ka ri Khasi. U nongleh ïa kane ka kam ruh imat u dei u briew bym don kmie ne hynmen ne para kynthei ne kaei pat kaba la pynlong ïa kum une u pohjait pohrati ban nud leh ïa kum kane ka kam khlemraiñ. Kane ym tang ba ka la ktah ïa ka jingsngew jong ka khynnah kaba la shah leh, hynrei ka la wanrah ruh ka jingsyier ha kiwei pat ki khynnah. Ngi hap ban long kiba husiar bad kiba phikir bha haba ïaid ba ïeng, namar ngim lah ban tip ki myrsiang ki suri kin ap thap na kino ki bynta ban ïoh rynsied.
Kawei na ki daw jong kine ki jingsniew ruh, imat ka la dei na ka jingkiew sted jong ka rynsan ‘social media’ ha kaba tang na ki shympriah kti ba rit, la lah ban ïoh lut kat kaba kwah. Naduh ki jingsniew haduh ki jingbha. Ngim ong ba ka rynsan ‘social media’ ka dei kaba sniew hynrei ngi hap pat ban nang ban pyndonkam, namar ha ka, ki jingbha ruh ki don, bad ki jingsniew har rukom ruh ki don. Lada ki jingmut jingpyrkhat ki long kiba tlot bad rit, tang katta ka jingsniew ka la lah ban synshar ban ïalam pat sha ki jingsniew ne ki jingbrai ba laiphew jait. Kawei pat ka daw ka lah ban dei ruh na ka jingjyllei jong u drok, kaba pynlong ïa kito kiba la kyrni ban leh ïa ki kam kiba har rukom, naduh ka tuh ka thiem, ka kam thombor bad kiwei kiwei.
Kumta ka long kaba donkam ïa ki bor ka aiñ, ki bor shnong ban ïakhun pyrshah ïa kum kine ki jingsniew bad ban pynkhlaiñ ïa ka rukom treikam. Ka rukom pynshitom ïa kum kine ki briew ruh ka dei ban long da kaba tyngeh khnang ba kiwei pat kin hap ban pyrkhat da ki hajar sien.
