Shillong, Jymmang 25
Ka ‘Skyscanner’, ka jaka lum jingtip haba ïadei bad ka leit ka wan kaba lah ban shaniah kaba ki nongleit jingleit ki bud, dang shen ka la pynmih ïa ka thup ki jaka jngoh kai ba pawnam tam ha ka pyrthei jong u snem 2025.
Ïa kane ka jinglum jingtip, la thaw da kaba buh jingthoh ïa ka jingkiew kaba heh tam haba ïadei bad ka jingwad (ïa kine ki jaka) ha kine ki 12 bnai ba la dep, bad ki jingmih ki la pyni ïa ki jaka baitynnad ha ryngkat ka jingdonlang ki rud duriaw, ki jaka lum, bad kaba phylla – kiba bun na kine, ki dei ki jaka sor ba long pdeng.
Ki hynriew tylli ki jaka jngoh kai ba pawnam tam ha u snem 2025 katkum ki ‘riew shemphang ki kynthup ïa ka Langkawi, Tokyo, Shillong bad kiwei-kiwei.
Haba phai sha ka Shillong, India – kum kawei na ki jaka pdeng jong ka kolshor ka put ka tem ba heh tam ka India nalor ka jingtyrwa ïa kiba bun ki jaka baitynnad ha kylleng ka sor, ka Shillong ka wanrah ïa ka jingshem kaba sngewtynnad na bynta baroh ki jait nongleit nongwan – ha kawei ka liang, dei na kane ka daw ba la kdew ïa ka kum kawei na ki jaka jngoh kai ba pawnam tam jong u snem 2025.
Ka Shillong, kaba don ha ka Thaiñ Shatei Lam Mihngi – kane ka jaka lum baitynnad ha kaba khatduh ka la ïoh ïa ka jingithuh, ha kaba ki nongwan jngohkai ki wan tuid sha ki kshaid ba noh rymphum kum ka ‘Elephant Falls’, ka ‘Law Kyntang ha Mawphlang, nalor ki jingkieng jri hajan Cherrapunji.
Langkawi, Malaysia – Mynta u snem, bun bah ki nongjngohkai pyrthei na India ki la jied ban leit sha ki dewlynnong ba khring ha Langkawi, ban ïa ki rud duriaw (Beach) ba dap briew jong ka Thailand na bynta ka jingleit shuti harud duriaw.
Ha ryngkat ka jingrung kaba khlem donkam ‘Visa’, ki lynti liengsuiñ kiba lyngkot, bad ka jingpynbha ha ka liang ki jaka sah baitynnad, kane ka jaka jong ki dewlynnong ka long ka jaka kaba biang tam na bynta ki nong India – nalor kiwei-kiwei ki jingkhring baitynnad kum ki kshaid bad ka jingking lieng ne ‘Mangrove Kayaking’ nalor kiwei-kiwei.
Nalor kine, sa kiwei pat ki jaka jngoh kai ba pawnam jong u snem 2025, ki kynthup ïa ka Tromsø – Norway, Krabi – Thailand bad ka Colombo, Sri Lanka kaba don ïa ki rud duriaw ba pawnam kum ka Mirissa, Bentota bad Unawatuna bad ki jaka lum kum ka Ella bad Kandy.
Shuh ka Tokyo, Japan ka long sa kawei na ki jaka jngoh kai ba pawnam mynta u snem. Haba phai tang ha ki 3 bnai ba shakhmat jong u 2025, ka Japan ka la sakhi ïa ka jingwan jong kumba 10.5 ‘million’ ngut ki nongwan jngoh kai, katkum ka Japan National Tourism Organization. Ka jingpynbyrngia ha ka por mynmiet jong ka Tokyo, ki jaka bam bad ka jingleit thied jingthied kaba khlem donkam siew khajna ki long katto-katne ki daw kiba khring ïa ki nongwan jngoh kai.
