Shillong, Jymmang 25
U Myntri Rangbah ka Jylla, Conrad K. Sangma ha ka Sngi Palei u la plie paidbah ïa ka ‘German Language Training Programme for Overseas Placement’ ha Shillong Tech Park.
Ka prokram ba la kyrshan da ka Meghalaya State Skill Development Society (MSSDS) hapoh ka tnad Labour, Employment & Skill Development, ka long ban ai jinghikai bad buh bynta ïa ka kam na bynta ki nongtrei ka koit ka khiah kiba la pyntbit napoh Jylla ha Germany.
Hadien ka jingjop jong ka jingpynpoi ïa ki samla ka Meghalaya sha Japan bad Singapore, ka Germany mynta ka la kylla long ka jaka kaba bud kaba tyrwa ïa ka rynsan ha ka pyrthei na bynta kito kiba angnud ban long nos bad kwah ban shakri ha ka liang ka koit ka khiah.
“Kaei kaba ngi leh hangne mynta ka sngi ka long ban pynkylla ïa ka jingtynjuh sha ka kabu kaba khraw. Ka Meghalaya ka long kawei na ki Jylla kaba don ïa ka jingbun briew kaba dang samla ha ka ri bad ngin pynkylla ïa kane ka jingïohnong ha ka jingbun briew sha ka bor pyrthei. Lada ngi phah wat tang 30,000 ngut kiba la pyntbit shabar ri, ka jingsiew ka lah ban kot sha ka T.250 klur shibnai – kata ka long T.3000 klur shisnem ha ka kti jong ki longïing jong ngi”, la ong u Myntri Rangbah.
U Sangma u la pyntikna ïa ka jingkyrshan ba pura na ka Jylla, kynthup ïa ka jingïarap pisa na bynta ka jingshah hikai banyngkong bad ban tei ïa ka jingshaniah na bynta ki kam shabar ri bad u la ong, “Ki kmie ki kpa shisien ka por ki la artatien namar ka jingsngewkhia halor ka jinglut bad ka jingshngaiñ. Mynta ka sngi, ka Sorkar ka ïeng kum ka nongpyntikna. Ngi don hangne ban pyntikna ba ki khun jong phi kin long kiba shngaiñ, kin shah ïalam lynti, bad ïoh ïa ki lad kiba paka tam.”
U Myntri Rangbah ka Jylla u la kular ruh ban leit synran hi dalade ïa ka kynhun banyngkong jong ki kyrtong ba shah jied sha Germany.
U la ong shuh-shuh ba kane ka jingïatreilang kan pynkhlaiñ ïa ka jingïadei hapdeng ka India bad ka Germany bad u sngewkmen ba ka Meghalaya lyngba ki nongtrei samla kiba khlaiñ jong ka, ka lah ban don bynta lang ha kata ka khana jong ka jingroi.
“Ka Germany ka ïakynduh ïa ka jingduna ba kyrkieh ha ka liang ki nongtrei ka koit ka khiah. Hapoh jong u snem 2035, ngin donkam shuh sa 7 ‘million’ ngut ki nongtrei kiba la pyntbit. Ka prokram mynta ka sngi ka pyni ïa ka jingïaid lynti kaba pynkylla ïa ka jingim – kine ki samla kin ym trei tang ha Germany hynrei kin roi, synñiang, bad kin kiew shaphrang,” ong ka Andrea Jeske, Deputy Consul General kaba mihkhmat ïa ka German Consulate Kolkata kaba la pynpaw ïa ka jingkyrmen skhem halor kane ka jingïatreilang.
Ka ‘IndieTalent’, ha ryngkat ka jingïatreilang bad ka ‘2COMS Group’, ka dei ka tnad pyntreikam kaba ai jingkyrshan kynthup ka jingai jinghikai, ka jingpynkhreh ïa ki ‘Visa’, bad ka jingbuh bynta haba ïadei bad ka kam ka jam.
Ha kane prokram, kito kiba shah jied kin hap ïaid lyngba ïa ka jingshah hikai kaba hynriew bnai ha ka ktien ‘German’, bud sa ki ‘Interview’, ki rukom ai ‘Visa’, bad ka jingai bynta khatduh ïa ka kam ha ki jaka sumar ba pawnam jong ka Germany.
