Shillong, Jymmang 25
Ka lehniam ka Raid Mylliem da U 5 Kur 11 Kur ha ryngkat ki khun ki hajar ka Raid Mylliem, kaba ju long bad sdang ha u bnai Rymphang man la u snem, naduh hyndai hynthai da ki Longshwa Manshwa kaba ju sdang na Mawnarian ha ki ar sngi bad bud pat ka shi sngi ha Lum Shulong ha ka sngi kaba Lai, nangta bud sa ka Shad Niam ba Lai sngi kynthih hadien ba la dep ka Niam na Lum Shulong, ka pynlong ïa ka lehniam kaba kypang bad kyntang ha ka Raid Mylliem na ka bynta ban ai nguh ïa la U Blei Kynrad halor ka jingkyrkhu jong U ban da ban ker ki ‘Lei Ryngkew Basa ïa ki Khun ki hajar ka It ka Hima ban biang ban bit ha ka imlang-sahlang ha baroh ki liang, ka synshar khadar kaba suk ba saiñ naduh Bisi haduh Bhoi Rymbong.
Mynta u snem da ka jingshimkhia u Lyngdoh bakhlieh ïa ka Raid lem bad u Myntri Syngteng Nongdhar bad U 5 kur ba shong lyngknot na ki khun ki hajar kiba don ka jingkitkhlieh, ki la shim ïa ka Lyngkor ban leh ban pyndep ïa ka Niam Raid hadien ba ki katto-katne ki Myntri ba dei ban leh ïa ka Niam kim shym la lah ban leh mynta u snem ïa ka Niam kumba ju dei ban long man la u snem hapoh ka Raid Mylliem kaba dei ka bynta ba kongsan hapoh ka synshar Niam jong ka Raid.
Kumta ka jinglehniam jong ka Raid Mylliem ka la sdang ha ka 24 tarik Jymmang bad haduh 29 Jymmang 2025.
