Shillong, Jymmang 25
Uwei u nong Bangladesh ha ryngkat bad ar ngut ki nongshong shnong ka Ichamati kaba hap ha East Khasi Hills, kiba donkti ha kaba ïarap pynrung pynmih, ki la shah kem noh ha ki pulit.
Katkum ka khubor na ki pulit la ong ba ha ka janmiet jong ka 24 tarik mynta u bnai, ki la ïoh jingtip ba ka don kawei ka kali Maruti A-Star kaba don ïa u registration number AS01-AP-0928 kaba la suba ba don ki briew ba dei ki nong Bangladesh.
La ong ba halor kane ka jingtip kaba la ïoh, ki pulit ka Sohra kumba ju leh ha ka ban pahara bad talasi kali, ki la bthah ruh ïa katei ka kali ban sangeh ha ka jaka ba talasi. Hynrei la ong ba kane ka kali, kam shym la sangeh bad ka la phet krad na kane ka jaka, kaba la pynlong ruh ïa ki pulit ban kthong nadien bad ïa kane ka kali la ïoh ban bat bad pynsangeh noh hajan ka jaka jngohkai kata ka Seven Sisters Falls Viewpoint.
Ki pulit ki la rah noh ïa u nongñiah bad ïa kiba don lang ha ka kali bad haba la tohkit la shem ba uwei na kiba shong ha kane ka kali u dei ba la tip kyrteng kum u Robiul Islam, 32 snem na ka shnong Tengra Khali, Paderhat, Pirojpur, Bangladesh.
Shuh shuh haba phla ha ki pulit, la ong ba utei u nong Bangladesh u trei kum u ‘electrician’ ne u nongshna light ha Bangalore bad mynta u la pyrshang ban leit phai noh sha Bangladesh da kaba pyndonkam da ka lynti kaba beaiñ. Ha kaba nyngkong, ka jingtohkit la sngewthuh ba kane kam dei shuh ka sien kaba nyngkong na ka bynta jong u ban pyndonkam ïa kane ka surok.
Ar ngut ki nong India kiba la tip kyrteng kum u Sujit Hajong, 32 snem bad u Ravi Singh, 38 snem, kiba dei ki nongshong shnong jong ka Ichamati Bazaar ha East Khasi Hills ruh ki la shah bat halor ka jingngeit ba ki dei kiba ïarap ïa utei u nong Bangladesh ban pynrung pynmih na shiliang sha shiliang pud.
Ki pulit mynta ki la sdang ïa ka kam hapoh ka ‘Foreigners Act’ bad ka jingtohkit ka la nang ïaid shakhmat ban sei madan ïa ki kam rung tuh bad ki briew ba donkti ha kane ka kam.
