Shillong, Jymmang 25
Ka Adhoc Committee jong ka Indian Olympic Association (IOA) ka la lah ban pynurlong na ka bynta ban jied ïa ki nongkitkam kiba thymmai jong ka Tripura Olympic Association ha kaba ka Dipa Karmakar ka la shimti kum ka President ba thymmai jong kane ka synjuk.
Katei ka ‘thei ïalehkai gymnastic barim jong ka ri kaba la 31 snem ka rta, ka la shah pynban smai ha ka 23 tarik mynta u bnai ha Agartala ha kaba la ïadon lang dkhot ka Adhoc Committee jong ka IOA ba kynthup ïa u Bah John F Kharshiing, Chairman & Working President jong ka Meghalaya State Olympic Association, u Robert R Royte, President jong ka Mizoram Olympic Association, bad u Bah Bamang Tago, Secretary General jong ka Arunachal Olympic Association.
Ïa ka kam General Secretary la thung ïa u Sujit Roy, bad kiwei pat ki 13 ngut ki nongkitkam ka Executive Committee jong ka Tripura Olympic Association (TOA) ki la jied bad kin shakri na ka bynta ka samoi treikam kaba saw snem kata naduh 2025 haduh 2029.
Ka IOA Adhoc Committee Tripura ka ai ka jingïaroh kaba khraw ïa ka President, General Secretary, ki Executive Members, bad kiwei pat ki nongkitkam jong ka TOA ba thymmai. Ka IOA ka ngeit skhem ba ha ka jingïalam jong ki, ka jylla Tripura kan ïoh ïa ka rukom pynïaid kam ïalehkai kaba biang bad kaba khud ba suba.
Ha ka jingïalang, u Chairman jong ka IOA Adhoc Committee, Tripura, u la pule ïa ka khubor kitbok na ka Dr. P.T. Usha, President jong ka Indian Olympic Association IOA, kaba la pynpaw da kaba ong, “Kane ka dei ka por ba kongsan ban pynpaw ïa ka jingïaroh jong ngi ban kyntiew ïa ka kam ïalehkai, ban pynïohlad, ban ai jingïarap bad ban ai lad ïa baroh, khlem da peit ïa ka rta, ka kynthei ne shynrang, ne ka jinglong jong ki. Kum ki nongpynïaid ka kam ïalehkai ha ka jylla, ka long kaba donkam ban trei lang ban lap ïa ki sap, ban tei ïa ki jaka ïalehkai, bad ban pynneh ïa ka riti ïalehkai kaba bha ha ka kyrdan ba sdang. Ka long ruh kaba donkam ban ïada ïa ka bha ka miat jong ki nongïalehkai. Ki dei ka mynsiem jong ka lawei jong ka kam ïalehkai jong ngi, bad ngi dei ban ai ka jingïarap kaba shai, kaba hok, bad ka jingïarap na ki tnad treikam kiba skhem. Kaba kongsan ka long ba kane ka Committee kan ïalam da ka jingïohi jngai, ka jingshisha, bad ka jingkitkhlieh kaba khraw.
