Shillong, Jymmang 25
Ki pulit ka distrik ki la pynlong ïa ka jingthwet kaba jur ïa u runar uba la leh khlemakor ïa kawei ka khynnah skul ha ka step 23 tarik Jymmang ha ka thaiñ Umsohsun.
Ki pulit kiba la shimkhia ïa katei ka jingjia, ki la pynlong ïa ka jingthwet kaba jur ban lap ïa une u briew bad la ïoh jingtip ba ki la ïoh pdiang ruh ïa ka jingujor na ki kmie ki kpa jong katei ka khynnah skul.
Ha kajuh ka por, la pynngat mukotduma ïa kane ka jingjia hapoh ka aiñ POCSO bad BNS.
Kum ban shu kdew hangne, ka dur-khih halor ka jingleh khlemakor jong uwei u runar ka la saphriang ha ki rynsan lad pathai bad kane ka la pynkyndit ïa baroh, naba kum kane ka jingjia kam pat ju jia koit.
Katkum ka dur-khih ba la ïoh ring lyngba ka kor CCTV jong kawei ka ïing, la ïohi ba utei u runar uba la kah durkhmat, u la leh ïa katei ka kam kaba ijli haduh katta-katta, kaba la ktah ïa ka longrynïeng jong kawei ka khynnah skul.
Ha kane ka dur-khih, la ïohi ruh ba une u runar u la bud nadien jong kawei ka khynnah skul kaba dang ïaid la ka jong ka lynti bad ynda u la poi hajan, u la khyllied ïa ka skad jong ka bad shondur.
Kane ka jingjia ka la jia ha ka step Sngi Thohdieng.
Na kaei kaba paw, la i kumba une u briew u da thmu ban leh ïa kane ka kam bymman bad pynlong sohpdung ïa ki khynnah kynthei khamtam ki khynnah skul.
Shuh shuh kane ka jingleh jong une u ‘riew bymman ka la wanrah ïa ka jingbym shngaiñ ha ka leit ka wan jong ki khynnah, khamtam lei ba u la leh ïa kane ka kam khlem jingsalia haba shit ba shai.
