California, Jymmang:
Ka Sorkar US ha ka Sngi Thohdieng ka la pynpaw ba ka jingdonkam ba hakhmat eh jong ka California ha kane ka por, ka long ban siew $82.5 million sha ka US Forest Service na ka bynta ka pluh khlaw kaba la bam duh da ki phew hajar akar (hectare) ki jaka khlaw.
Ka ding Bobcat jong u snem 2020, ka la bam duh bun phew tylli ki jingtei, katba ka dang bthei lyngba ki lum San Gabriel, kiba don shaphang shatei jong ka Los Angeles.
Ka sorkar America ka la ong ba ka Southern California Edison kam shym la teh lakam bha ia ki jingthung jingtep kiba don hajan ki lain bor ding jong ka bad ka ding ka la bthei haba ki dieng ki la ktah ia u live wire.
Ka mukotduma jong u snem 2023 ka la dawa bai lutksan na ka kompeni na ka bynta ka jinglut ban ïaleh pyrshah ïa ka ding ha ka jaka jong ka Forest Service bad kumjuh ruh na ka bynta ban pynbha ïa ki jingjulor ha ki jaka shong camp, ki lynti ïaid kjat bad ki jaka shong jaka sah jong ki mrad khlaw.
“Kane ka jingpynbeit rekod pyrshah ia ki bor pyniaid ka Southern California ka ai ka jingsiew bai lutksan kaba don jingmut ia ki nongsiew khajna na ka bynta ka jinglut kaba heh ban ialeh pyrshah ia ka ding Bobcat bad na ka bynta ka jingpynjot kaba la saphriang bha ia ki jaka paidbah,” la ong u Bill Essayli, u nongiasaid ain jong ka US.
“Ka ophis jong nga kan dang bteng ban bud tyngeh ban ïoh biang ïa ki jinglut jingsep bad ki jingpynjot ïa ka mariang na kano kano ka kynhun kaba wanrah jingma ïa ki khlaw jong ki paidbah bad kiwei kiwei ki marpoh khyndew ba kordor jong ka ri.”
Ka kompeni ka la aiti palat ia ka $2.7 billion ha ki jingpynbeit halor ka ding Thomas kaba la pluh ha u snem 2017 kaba la klang ha ki county Ventura bad Santa Barbara ha kaba la pyniap ia arngut ki briew bad pynjot da ki spah tylli ki jingtei.
Ka la siew $2.2 billion na ka bynta ka ding Woolsey jong u snem 2018 kaba la klang lyngba ki Los Angeles bad Ventura county, kaba la pyniap ia lai ngut ki briew bad pynjulor ia palat 1,600 tylli ki jingtei.
Ki nongtohkit kiba wad bniah ia ka ding Eaton kaba la pyniap briew, kawei na ki ar tylli ki jingpluh kaba la bthei ha ka Los Angeles ha kaba sdang jong une u snem, ki dang wad bniah ia ki lain pynpoi ding jong ka SCE kum ka lad ban pynbthei ding.
