Shillong, Jymmang 26
12 ngut ki rangïalehkai Mixed Martial Arts (MMA) ka Jylla kin pynkhreh ban ïashim bynta ha ka rynsan ïakhun ba la tip kum The Shillong Cage Fighting Championship (SCFC) kaba la thmu ban pynlong ha ka nongbah.
Haba pynpaw ha ki lad pathai khubor ha ka Lah Sngi U Blei, u Bah Isaiah Kharmawphlang ryngkat bad ka kynhun ka jong u, ki la pynbna ïa kane ka lympung yn pynlong ha ka 28 tarik u Jylliew mynta u snem ha Lariti Multipurpose Theatre, Mawkasiang, New Shillong, ha kaba ki rangïalehkai ba kynsai bad kiba kham paw ha kum kane ka jait jingïalehkai, kin pynkhreh ban kiew rynsan bad ba kin aireng pyrshah ïa kiwei pat ki rangïalehkai MMA jong ka ri.
Kat kum ka jingïathuh da kine ki nongpynïaid, la ong ba ki katto-katne ki rangïalehkai MMA ka Jylla kiba kham paw bad ba kin aireng ki long kum u Johny Nongrum, kaba dei artad ka jingïakhun kaba 100 ha ka jingim ïalehkai MMA ka jong u bad kaba lah ban dei artad kaba khatduh.
Na ka liang u Bah Isaiah u la pynpaw ba kane ka dang dei tang ka sien jam ba kum ka kynhun ki pyrshang ban pynlong ïa kane ka jingïakob mynta ka snem, ïa kaba lada biang ka jingkyrshan pisa na ka liang ki bor Sorkar, ki kwah ba kin da kham pynjanai ïa kane ka lympung ïalehkai da kaba kin pyrshang ruh ban da ïoh ïa ka jingithuh (licence) kaba tikna na ki bor kiba dei khmih khnang ba ki lah ban jam shakhmat ban pynlong bun tylli ki jait jingïakhun kiba kum kine.
Kumba ka long mynta, bun bun sien ki nongïa-lehkai MMA ka jylla, ki hap ban mih na la ka jong ka jylla ban leit ïakhun shabar, hynrei lyngba kane ka rynsan ïakhun jong ka SCFC, kan plie lad ïa ki ba kin ïoh ba kin ïakhun ha la ïing ha ryng-kat u paidbah nongkyrshan jong ki.
Ha kaba ïadei bad ka bai rung sha katei ka lympung na ka bynta ki paidbah, u Bah Isaiah u ïathuh ba ka jingdie ïa ka tiket kan long lyngba ka website www.scfc.in.
