Shillong Jymmang 26
U MP ka Rajya Sabha, Dr. W.R Kharlukhi u la ong ba ka jingïalang jong ka Executive Council (EC) ka North Eastern Hill University (NEHU) kan long ha ka 30 tarik u Jymmang.
U Dr. Kharlukhi u la ong, “Nga dang shu wan na ka jingïalang ha NEHU. Nga tharai ba ka Sorkar ka la dep ban ïakren bad kin sa pynlong ïa ka jingïalang jong ka Executive Council ha ka 30 tarik u Jymmang ha Delhi”.
U MP u la ong, ba ïa ka jingïalang ka EC yn pynlong ha Delhi ban ïakren halor ka kynrum-kynram kaba la mad da ka skulbah.
Ha kaba ïadei bad ka jinglong-jingman ha NEHU, u Dr Kharlukhi u la ong, ka la sdang ban wanphai biang sha ka jinglong kaba bit ba biang naduh ba ka Prof. Sherwin M Sungoh ka la shimti kum ka Acting Vice Chancellor.
Shuh shuh u la ong, “Da ka jingshimti jong ka Vice Chancellor, mynta ka la sdang ban biang bha. Mynne ngi la don ïa ka jingïalang ha kaba la donlang ki nonghikai bad ki samla pule. Ka lah nang bha bad ka la sdang ban long biang kumba ka ju long.”
Ha kaba ïadei bad ka jingdawa ban weng noh ïa u Prof. P.S Shukla kum u VC ka NEHU, u Dr Kharlukhi u la ong, “To ngin ïa ap shwa ïa kaei ka ban mih na ka jingïalang jong ka EC bad tang hadien jong katei, ngin sa lah ban rai ïa kaei kaba ngi dei ban leh”.
