Nongpoh, Jymmang 26
Ka Khasi Students’ Union (KSU) Nongpoh Circle ka la dawa mardor na ki bor pynïaid jong ka Civil Hospital Nongpoh ban thung ïa ka jingtohkit bad ban pynshitom tyngeh ïa ki nongtrei kiba trei torti ïa ka kam. Kane ka jingdawa ka seng ka dei hadien ka jingujor jong kawei ka longkmie na ka thaiñ Umden kaba la leit ban kha khyllung ha katei ka jaka ai jingsumar ha ka 10 tarik u Jymmang, 2025.
La ïathuh ba katei ka longkmie, ka la ïoh ban mih na katei ka jaka ai jingsumar ha ka 14 tarik jong u bnai Jymmang, 2025 bad ha ka Sngi U Blei ka 25 tarik mynta u bnai, la mih pynban da u kynphad katba katei ka longmie ka dang leit shabar ha kaba ka la pynsheptieng bad pynlyngngoh ngaiñ ïa ka.
Da ka jingsngewkhia halor kane ka jingjia, ki nongïalam jong ka KSU Nongpoh Circle ha ka Lah Sngi U Blei ki la leit ban kynduh syndon ïa ka Dr. D Blah, Medical Superintendent jong ka Nongpoh Civil Hospital na ka bynta ban ïoh jingpynshai halor katei ka jingjia.
U samla Rishot Lapang haba kren sha ki lad pathai khubor u la ïathuh ba ka seng hi tang mar ïa ïoh jingujor halor kane ka jingjia, mar-mar ha kane ka sngi ka la leit hiar sha Nongpoh Civil Hospital ban wad jingshai hynrei namar ba ka dei ka Sngi U Blei bad ka jingbym don ki ophisar, ka la pynlong ïa ka seng ban buddien biang ïa katei ka kam ha ka sngi kaba bud.
U samla Rishot Lapang u la ïathuh ruh ba ha ka jingkynduh jong ka seng, ka Dr. D Blah ka la kubur ba ka la don ka jingbakla na ka liang jong ki nongtrei katei ka jaka ai jingsumar bad kular ruh ïa ki nongïalam ka seng ba kan shim ïa ki sienjam kiba tyngeh ban pynshitom ïa ki nongtrei kiba leh torti ïa la ka kam khnang ba kum kine ki jingjia kin ym wan jia shuh hadien habud.
