Shillong, Jymmang 26
Ka jingangnud jong ka Aston Villa ban ïoh rung sha ka Champions League kam shym la urlong hadien ba ka la mad ïa ka jingshah rem noh ha ka jingïalehkai kaba khatduh jong ka Premier League ha ka Manchester United da 2-0 kol ha ka Sngi U Blei ha Old Trafford.
Kane ka jingïalehkai ka la kylla long ka jingdiaw mynsiem na ka bynta ka Villa ha kaba u Morgan Rogers uba la ïoh ban thep kol, hynrei u la shah khanglad noh na ka daw ba u la kum pynur ïa u rangapkol ka United, u Altay Bayindir. Kane ka jingbym la lah ban pynurlong ïa ka jingjop ka la pynlong ïa ka Villa ban duh rung sha katei ka lympung ba paw ha Europe hadien ba ka la wan ha ka kyrdan ba hynriew.
Wat hapdeng ka jingbym lah ban thep kol baroh ar ki kynhun ha ka kylla step, hynrei ka United ka la lah ban pynurlong ha ka kylla miet da kaba ka la ïoh ban thep ar kol ha shwa ban wai lyngba u Amad Diallo (76) bad kawei pat lyngba ka penalty na u Christian Eriksen (87) na ka bynta ban jop shi syndon.
Nalor ka Liverpool kum ka lahduh bad ka Arsenal kaba wan ba-ar, kiwei pat ki kynhun kiba la lah ban pynthikna ban ïoh rung sha ka Champions League dei ka Manchester City, Chelsea bad ka New Castle United.
