Shillong, Jymmang 26
Ka Meghalaya Football Association (MFA) ka la pyllait paidbah ïa ki kyrteng jong ki rangïalehkai kiba la ïoh ïa ka jingmynjur ban kynriah klob (Inter District Transfer) na kylleng ki district na ka bynta u snem 2025.
Baroh lang ki don 329 ngut ki rangïalehkai kiba la pyndep ïa ka jingpynïasoh sha kiwei pat ki klob bad kane ka la long kham palat na kaba long ha u snem ba la lah kiba don 122 ngut. Ka tarik ba khatduh ban pyndep ïa ka jingpynkynriah klob ka la poi sha kaba kut ha ka 24 tarik mynta u bnai.
Ki kynhun ïalehkai kiba ïasoh bad ka Shillong Sports Association ki la pyndep ban soi 95 ngut ki rangïalehkai na kiwei pat ki kynhun ïalehkai jong ki district, katba kiba ïasoh bad ka Thadlaskeiñ Sports Association (TSA) ki la don 72 ngut bad ka East Jaiñtia Hills District Football Association ka la soi 54 ngut.
Haba ïasam ïa ka thup jong kiba la mynjur ban pynkynriah klob, u General Secretary ka MFA, Bah Sunesh Syiem u la pynkynmaw ïa baroh ki synjuk ïalehkai jong ki district ba ym don uwei ruh u rangïalehkai uba lah ban ïalehkai na ka bynta palat ïa kawei ka district sports association ha ka shisnem aïom. “Sngewbha kynmaw ba lada lap ba don kino kino ki rangïalehkai kiba pynkheiñ ïa kine ki kyndon, ki rangïalehkai bad ki synjuk ïalehkai jong ki district kin shah pynshitom ha ka MFA,” u la bynrap.
