Nongstoiñ, Jymmang 26
Haduh 214 ngut tam ki nongshad ba kynthup ïa ki kynthei bad shynrang ki la ïashim bynta shitrhem ha ka Shad Suk Mynsiem jong ka Seng Khasi West Khasi Hills ïa kaba la pynlong ha madan New Nongstoiñ ha ka Lah Sngi U Blei ryngkat ka ïaid beit ïaid ryntih bad ka iphuh-iphieng.
U Babu P Ryntathiang, President ka Seng Khasi West Khasi Hills District u la ïathuh ba ha kane ka jingshad ka khlem don kano-kano ka jingpynthut jong u slap wat haba u la ther khlem sangeh naduh mynnin haduh ka por 3 baje mynta ka sngi shuwa ban pyndep ïa ka nguh ka dem jong ka seng bad mar sien dep ka jingduwai hi ka suiñ bneng ka la plie ïa ka lad ban ïoh sdang ïa ka jingshad.
Shuh shuh u la ong ruh ba kane ka Shad Suk Mynsiem ka dei ruh kaba 25 mynta u snem namar ba la sdang ïa kane naduh u snem 2000 bad ïa kane ka jingshad ym shym la pynlong da kaba shu ïa mynjur shongshit ruma ne leh khlem ka nongrim hynrei la ju duwai phirat bad da kylli pyrthew na u kynrad u nongbuh nongthaw la u shah ne em ban pynlong ïa ka jingshad.
Ha kane ka sngi u Bah O Pyngrope, Lamphang ka Seng Khasi Sengkmie na Shillong, u la ïoh ban pynhap ïa ka lama jong ka seng ryngkat ka jingïadonlang u Bah Hainess Marbaniang, Pyndap Phang ka Seng Khasi Sengkmie bad kiwei kiwei ki tymmen ki san ka seng, ryngkat ka jingïasakhi lang ruh u Bah Garod LSN Dyke, Deputy Commissioner ka West Khasi Hills District bad kiwei kiwei ki ophisar.
