Shillong, Jymmang 26
Ka Seng Samla Mawlai Motsyiar ha ka U-15 bad ka Seng Samla Mawlai Phudmuri ha ka U-17 ki la long kum lahduh ha ka Inter Dong Football Tournament ba la pynïaid da ka Mawlai Sports Club (MSC).
Ha ka jingïakhun final jong ka Under-15 kaba la long ha ka 24 tarik mynta u bnai ha Madan Heh Mini Stadium kaba ha Mawlai Phudmuri, ka Seng Samla Mawlai Motsyiar ka la lah ban pynliem noh ïa ka Seng Samla Mawlai Phudmuri da 2-0 kol. Ïa kine kol la thep da u Habaniel Marbaniang bad u Lawan Khongjee.
Haba phai sha ka jingïakhun final jong ka Under-17, ka Seng Samla Mawlai Phudmuri ka la lah ban pynliem noh ïa ka Seng Samla Mawlai Nonglum da 2-1. Ïa baroh ar tylli ki kol jong ka Phudmuri la thep da u Ïaisanlang Dohling, katba ïa ka shi kol na ka bynta ka Nonglum la thep da u Jerry Malngiang.
Lyngba kine ki nam jop, ka SS Motsyiar U-15 bad ka SS Phudmuri U-17 ki la ïohpdiang ïa ki song pisa kiba mar T. 10,000 tyngka ryngkat ka trophy, katba ka SS Phudmuri U-15 bad ka SS Nonglum U-17 kiba la wan ba-ar, ki la ïohpdiang mar T. 5000 tyngka ryngkat ki trophy.
Ha katei ka sngi la sam ruh ïa ki khusnam shimet, ha ka Under-15 ïa ka nam Best Player la ïoh da u Lawan Khongjee (SS Motsyiar), Best Goalkeeper sha u Nahun Khongjee (SS Motsyiar) bad ka Top Scorer ka la leit sha u Renan Warjri (SS Phudmuri).
Katba ha ka Under-17, ka Best Player ka la leit sha u Ebenezer Nongrang (SS Phudmuri), best Goalkeeper la ïoh da u Reuben Kurbah (SS Mawlai Kyntonmassar) bad ka Top Scorer sha u Iaisan Dohling.
Ha katei ka sngi la ïadon lang u Bah F. Syiem, Chief Engineer District Council, uba dei ruh u rangïalehkai barim ka Mawlai Sports Club (MSC) kum u kongsan, u Bah Marcel Kharbani, President ka MSC kum u symbud kongsan, ha ryngkat u Bah Hering Shangpliang, Rangbah Shnong jong ka Mawlai Phudmuri, Nonglum bad kiwei kiwei.
Haba ai jingkren u Bah Syiem u la kyntu ïa ki khynnah ba kin pynleit ha ka jingpule bad ha ka jingïalehkai ruh de, khnang ba kin lait na ki jingmlien basniew bad ban ïoh ïa ka met ka phad ba shait ba khlaiñ.
U la ong ruh ha ka phutbol ha kine ki sngi mynta ki don bun ki lad ki lynti ha kaba ki coach ki lah ban pyntbit ïa ki lada ki trei shitom bad pynleit jingmut.
