Shillong, Jymmang 26
Ar ngut ki shikurim kiba dei na Indore ha Madhya Pradesh ki la jah rngai katba ki dang leit shang kai sha ki jaka jngoh kai ha ka thaiñ Sohra ha East Khasi Hills bad la ong ba la ïohi khatduh ïa ki ha kawei na ki jaka jngoh kai ha katei ka thaiñ.
Kine ki shijur kiba la jah rngai ki dei ba la tip kyrteng kum ka Sonam Raghuvanshi bad u Raja Raghuvanshi ba la 29 snem.
Ha kaba ïadei bad ka jingjah rngai jong kine shikurim, la pyntip sha ki pulit da ki bahaïing hadien ba kim shym la ïoh shuh ban ïakren namar ka phone jong ki, ka la ong beit ba la ‘Switch Off’ bad kane ka la pynkhuslai mynsiem shi katdei eh ïa ki bahaïing.
Ki pulit ki la ïathuh ba u hynmen jong ki, uba kyrteng u Govind, u la pyntip sha ki pulit ba kine ar ngut ki la jah rngai bad ki mobile phone jong ki ruh ki la lip naduh ka miet Sngi U Blei.
Katkum ki tyllong khubor na ki pulit, la ong ba kine ar ngut ki la shim wai da ka arshaka ban leit kai sha Sohra, hynrei la ïohi khatduh ïa ki ha ka Sngi U Blei.
Ki pulit ki la ïathuh ruh ba ki la lap ïa katei ka arshaka ba ki la shim wai hajan Sohra Rim, hynrei ym shym la ïoh jingtip shuh shaphang jong ki shano ki don namar ka phone jong ki ruh ka la switch off.
U Govind Raghuvanshi, para jong u Raja, uba la don mynta ha Sohra, u la kyrpad ïa ki paidbah ba kin ïarap lem ban pyntip lada ki ïohi ne don jingtip shaphang jong kine ar ngut shikurim.
Ha kaba ïadei bad kane, na ka liang jong ki pulit ki la sdang pynlong ïa ka jingtohkit ban lapdien ïa kine ki ar ngut bad ruh ki la hiar ban ïawad kylleng ki jaka kynthup ïa ki hotel, ki homestay bad ki nongaiwai kali ban ïoh ksai.
Wat la kam pat don kano-kano ka jingpynthikna, ki pulit ki suba jur ba kine shikurim ba jah rngai, ki lah ban jah na ka jingleit ïaid kai sha ki jaka riat jong ka thaiñ khlem da don ki nongïalam lynti.
Lah ban kdew hangne, ka ophis u Sub Divisional Officer (Civil) Sohra, ka la pynmih ïa ka jingbthah ha ka 15 tarik Ïaïong ba kyntu ïa baroh ki nongwan shang kai sha ka thaiñ Sohra ba kin ym leit tur shajan ki jaka riat, ki wah bad rung sha ki khlaw.
