Tura, Jymmang 26
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka don ka jingeh ha ka ban pyntreikam ïa ka Tura Medical College bad Hospital, naba ban thung ïa ki ‘riew shemphang bad ki doktor na bynta kane ka kolej kan long kaba jwat namar ka jingduna ha ka liang ki ‘riew shemphang kiba la pyntbit hapoh ka Jylla.
“Ka Sorkar ka kwah ban pynshai ba ka Tura Medical College bad Hospital kan ïai long ka ‘jingdon-jingem jong ka Sorkar’, katba ka jingpynïaid ïa ka kolej kan long da ka kynhun ki ‘riew shimet,” ong u Myntri Rangbah ka Jylla haba kren ha ka jingïalang ha Mendipathar, North Garo Hills.
Kane ka jingkren jong u Myntri Rangbah ka long hadien ba u nongïalam ka Liang Pyrshah, u Dr. Mukul Sangma u la ther tyngeh ïa ka Sorkar Synrop ba la ïalam da ka NPP halor ka rai jong ka ban pynlong shimet ïa ka Tura Medical College bad byrngem ruh ban pynlong da ka jingïakhih kum ka jingpyrshah lada ka Sorkar kam lah ban weng ïa kane ka rai jong ka.
“Kiba bun na ki jaka (seat) ha ka kolej yn buh kyrpang na ka bynta ki samla pule ka Meghalaya, katba katto-katne ki jaka yn ai sha ki bor pynïaid shimet – ka ban ai lad ïa ki ban pyntyllun ïa ka jingpynïaid kam ïaid jam bad ka tulop jong ki nonghikai ka kolej. Ka ‘hospital’ kan treikam kum ka tnad Sorkar,” la ong u Myntri Rangbah ka Jylla.
“Ki samla pule ka Jylla kiba pule ha kane ka kolej kin don hapoh jong ka ‘State Quota’, katba katto-katne ki jaka kin don hapoh ka ‘Management Quota’, ïa kaba yn pynïaid da ki bor pynïaid shimet,” u la ong shuh-shuh.
Da kaba kdew ba kam don jingthmu ban aiti pura ïa ka jingpynïaid ïa ka Tura Medical College bad Hospital sha kino-kino ki kynhun ‘riew shimet, u Myntri Rangbah u la ong, “Ka jingpynïaid ïa ka Medical College kan don bad ka kynhun ki ‘riew shimet, katba ïa ka jinglong trai jong ka Hospital bad ka Kolej kan sah ha ka Sorkar.”
U la ïathuh ruh ban pynïaid ïa ka kolej pule laiñ doktor ka donkam ban bud ryntih ïa ki kyndon ka Medical Council, kynthup ban don ïa ki nonghikai kiba don ïa ka jingshemphang kaba donkam.
“Da kaba buh jingmut ïa ka jingduna jong ki doktor kiba la pyntbit kyrpang ha ki ‘hospital’ ba la pynïaid da ka Sorkar, bad ka jingduna ki ‘riew shemphang na ka Jylla kumba la ïakynduh ha ka por ba thung kam na ka bynta ka Shillong Medical College, ka Sorkar kan pyntreikam ïa ka Tura Medical College kum ka “jingtreilang” hapdeng ka Sorkar bad ka kynhun shimet ba la jied, ryngkat bad ki bynta kiba khyndiat bad kiba la batai bniah,” ong u Myntri Rangbah ka Jylla.
