Mawkyrwat, Jymmang 26
Uwei u samla uba dang 22 snem ka rta ïa uba la tip kyrteng kum u Saiñkupar Lyngkhoi, kaba ka shnong trai jong u ka dei na Lawbyrtun, Eastern West Khasi Hills bad shongkha pat ha ka shnong Lawblei ha South West Khasi Hills District u la duh ei ïa la ka jingim hadien ba u la ur bad hap ha ka Wah Umngi katba u dang leit tong doh bad leit khwai bad ki paralok.
Katkum ki tyllong khubor ba la ïohlum na ki pulit, la ïathuh ba katei ka jingjia ka la jia ha ka janmiet jong ka Sngi U Blei ka 25 tarik u Jymmang, 2025 ha ka por kumba 7 baje eiei ha kawei ka jaka kaba tip kum ka Shar-Shar kaba jngai kumba 2 km eiei na ka surok Mawkyrwat, Shillong.
Shuh shuh ki tyllong khubor ki la ïathuh ruh ba u Saiñkupar Lyngkhoi ha ka janmiet jong ka 25 tarik ha ka por kumba 3 baje janmiet ha ryngkat bad 3 ngut ki para shnong ki la leit tong doh bad leit khwai ha katei ka wah. Hynrei ha ka por kumba 7 baje eiei janmiet namar ka jingbakla, u Saiñkupar Lyngkhoi la ur bad hap shapoh katei ka wah bad la suba jur ba u la ngam jyllop.
Ha kaba ïadei bad katei ka jingjia, ki paidbah shnong ki la pyrshang ban wad ïa ka met jong u hynrei kim lap.
Ha ka step kaba bud jong ka 26 tarik, ki pulit ka Mawkyrwat ryngkat ka kynhun jong ka Search & Rescue Team (SRT) na Shillong ki la poi sha katei ka jaka ban sei ïa ka met, hynrei namar ka jingkhlaiñ jong ka um bad ka jinglong kroh ka jaka haduh mynta kim shym lah ban sei ïa ka met bad hap wan phai sha Mawkyrwat.
Haba ïakren bad u Myntri Shnong Lawblei, Bah Swington Lyngdoh, u la pynpaw ka jingsngewsih halor katei ka jingjia bad u ïathuh ruh ba ka shnong man ka por ka la ju maham ïa ki nongshong shnong ba kim dei ban leh shngaiñ ïatei ka wah bad ba kin long kiba husiar namar katei ka wah ka dei kaba la ju bam briew na ka por sha ka por bad man ka snem don ki briew kiba duh ei ïa la ka jingim namar ka jingleh shlur jong ki khlem da pyrkhat.
