Shillong, Jymmang 26
U Bankhrawnam Ryndong u la wanrah burom ïa ka ri India bad ka Jylla hi baroh kawei da kaba khur ïa ka takma rupa ha ka Asian Belt Wrestling Championship 2025 ha ka Sngi U Blei ha ka nongbah Delhi.
Ka jingïohpdiang une u rangïalehkai ïa katei ka takma ka dei ha ka kyrdan ïalehkai Under-15 Boys 60kg Free Style.
Kumba ka paw u Bankhrawnam u dei tang ma u marwei ban mihkhmat ïa ka ri India na ka jylla Meghalaya sha katei ka lympung kaba la sdang naduh ka 23 tarik mynta u bnai bad u la lah ban pyni ïa ka jingtbit hakhmat ki rangïalehkai ka dewbah Asia.
Ha lyndet jong kane ka jingjop ka dei lyngba ka jingïalam bad btin lynti da u nonghikai bad uba long ruh u nongïalam u Bah Donny Rafael Ranee bad wat haduh ka United World Wrestling (UWW). Ka Jylla ka la lah ban sei ruh ïa ka rephri (International Referee) ka Lorenza Songthiang.
Na ka liang ka All Meghalaya Traditional Wrestling & Pankration Association ka la ai khublei ïa utei u rangïalehkai uba la wanrah ïa ka jingjop. “Kane baroh ka dei lyngba ka jingtrei shitom, ka jingkheiñ duh bad ka jingïatylli lang hapoh ka kynhun kat haduh ban da lah ban wanrah burom ïa ka ri bad ka jylla hi baroh kawei.”
Na ka liang katei ka synjuk kan leit ban pdiang burom ïa utei u khlur ïalehkai lem bad ka rephri na Guwahati ha ka Sngi Ba-ar haduh ba kin da wanphai sha kane ka nongbah.
