Shillong, Jymmang 26
U MP ka Rajya Sabha, Dr WR Kharlukhi u la ther tyngeh ïa ka National Green Tribunal (NGT) da kaba kynnoh ba ka leh shiliang bad trei arsap, bad ïa kane ka jingleh ka jong ka, un sa rah ban ïakren hapoh ka ïingdorbar Parliament.
U Dr Kharlukhi haba kren bad ki lad pathai khubor ha ka Lah Sngi U Blei u la kynnoh ba ka NGT kam shym la leh eiei halor ki khubor ka jingïap da ki lak ngut ki briew na ki jingpang kiba mih na ka jingpynmih jaboh jong ki karkhana hynrei ka kloi pat ban shimkhia bad leh eiei pyrshah tang ïa ka jingpynjaboh ïa ka mariang.
Une u MP ka Rajya Sabha, uba dei ruh u Nongïalam barim ka NPP ha Meghalaya u la ong, “Ngan sa wanrah da ka zero hour notice ha Parliament. Ka NGT ka long pyrshah bha ïa ka jingtih dewïong beaiñ ha ka Jylla, ki la ïaleh pyrshah ïa ki briew jong ngi bad ka la ktah jur bha ïa ki nongtih dewïong barit baria. Hynrei kaei kaba pynshaïong ïa nga ka dei ka khubor kaba mih ha ka ‘The Hindu’ ba ong ba da ki lak ngut ki briew ki la ïap namar ka jingpynmih jaboh jong ki karkhana. Ka NGT ka la leh aiu halor kane, bun ki nongbah ki la shah ktah namar kane? Ngan sa rah ïakren ïa kane ka mat ha Parliament.”
“Ki briew jong ngi ki la shah ktah bha na ka jingkhang tih dewïong ka NGT ha u snem 2014 khamtam ba ka kam tih dewïong ka dei ka lad kamai jakpoh da ki sawphew snem ïa ki hynrei kynsan kynsan la shu khang ïa kane ka kam,” ong u Dr Kharlukhi bad bynrap ym tang ba ka ktah ïa ka kamai jakpoh jong ki hajar ngut ki briew hynrei ka la ktah jur ruh ïa ka jingïoh lum khajna ka Jylla bad ki Autonomous District Council (ADC).
Shuh shuh, u Dr Kharlukhi u la ong, “Kaba pynsuba ïa u halor kane ka jingtrei bad peit shiliang ka long balei ba ka NGT kam leh eiei pyrshah ïa ki karkhana, kiba la long shai bha ha ka kot khubor ‘The Hindu’ ba da ki lak ngut ki briew ki la ïap na ki jingpang ba pynmih jaboh ki karkhana.”
U Dr Kharlukhi u la ong, lada peit ïa ka rukom trei jong ka NGT, i kumba ka kham kordor ka mariang ban ïa ka jingim jong ki briew, namar ki la ong ba ka jingtih dewïong thliew khnai ka ktah ïa ka mariang hynrei balei kim ïohi pat ka jingpynjaboh da ki karkhana kaba ktah ïa ki jingim ki briew?.
U la ïai bteng da kaba ong ba ha ka jingshem jong u, ki wah ki la kylla jaboh namar ka jingpynhap dewïong ym dei na ka jingtih dewïong. U la ban jur ïa ka jingdonkam ban don ka jaka kaba biang ban pynhap ïa u dewïong khnang ban pynthikna ba ka um bih (acid) na u dewïong kan nym tuid sha ki wah.
