Shillong, Jymmang 26
U Superintendent of Police (SP) jong ka East Khasi Hills Bah Vivek Syiem u la pyntip ba ka jingwad ban lapdien ïa ki shikurim na Indore kiba jah rngai ha Sohra ka la ïaid shaid-shaid.
Haba kren sha ki lad pathai khubor, u Bah Vivek u la ong, ïa kine ki shikurim kata u Raja Raghuvanshi bad ka Sonam Raghuvanshi, la ïohi khatduh ha ka Sngi Palei ka 22 tarik Jymmang. Ki la shim wai ïa kawei ka arshaka Yamaha na Keating Road, Shillong bad leitkai sha Mawlakhiat. Nangne, ki la hiar sha Nongriat bad sahmiet ha ka Shipara Homestay.
U SP u la ïathuh ba kine shikurim ki la mih na Nongriat ha ka por mynstep kumba 5:30 baje eiei bad ki la wanphai sha Mawlakhiat bad la pyntip hadien ba ïa ka arshaka la shu ieh ha Golden Pines Dhaba, Sohra Rim da ki nongshong shnong, ha ka 23 tarik Jymmang.
U Bah Vivek u pyntip ba ka jingwad ïa kine ki shikurim ka la ïaid shakhmat bad pyntip ruh ba la dep ban pyntip ïa baroh ki kynhun kynthup ki shnong ba marjan bad ki pulit lem bad ki Home Guard ki la don sha ki jaka ba marjan ka Sohra Rim ban wad ïa kine ki shikurim. Ki bor ba dei khmih ki la kyntu ïa ki trai shnong bad ki nongleit shang kai sha ka thaiñ ba kin pyntip lada don kino-kino ki jingtip kiba lah ban ïarap ha ka jingwad ïa kine shikurim.
