Shillong, Jymmang 26
Ka North-Eastern Hill University (NEHU) ha ka Lah Sngi U Blei ka la rakhe ïa ka ‘University Day’ kaba 52 jong ka skulbah da kaba pyllait paidbah ïa ka ‘Anthem’ bad ka ‘Compendium’.
Ka NEHU, kawei na ki skulbah ba pawnam ha ka Thaiñ Shatei Lam Mihngi ka la rakhe ïa ka ‘University Day’ da ka jingkmen kaba khraw bad ka jingkyrmen kaba thymmai na ka bynta ka lawei.
U Dr. W. R. Kharlukhi, MP ka Rajya Sabha bad samla pule barim ka NEHU u la long kum u Kongsan ha kane ka sngi.
Ïa kane ka jingrakhe la sdang da ka jingpyllait paidbah ïa ka jingrwai jong ka skulbah kaba la ai kyrteng “Rise Up and Build” da u Kongsan.
La thaw ïa kane ka jingrwai da u Dr. Uttam Sharma, ryngkat ki kyntien ba la thoh da u Prof. Shobhan N. Lamare.
Ha ka jingkren jong u Prof. Lamare, u la batai bniah shaphang ka jingpynshlur kaba don ha lyndet jong ka jingrwai, da kaba pynksan ïa ka jingmut jong ka jingong ka skulbah “Rise Up and Build” bad ka dak jong ka sngi kaba mih-kaba pyni ïa ka jingshai, ka jingshisha bad ka bor.
U la kdew kumno ba ka jingrwai ka shim na ka jingitynnad jong ka mariang bad ki khanatang jong ka ri, ki wah, bad ki wahduid, ha kaba kut ka thmu ban pynshlur ïa ki samla ban shim ïa ka jingkitkhlieh bad shakri ïa ka jaidbynriew.
Ka jingïalang ka la sakhi ïa ka jingïashim bynta kaba sngewtynnad na ki dkhot jong ki nonghikai, ki nongtrei bym hikai, bad ki samla pule, kaba pynpaw ïa ka mynsiem ïa tylli kaba pynlong ïa ka skulbah ban ïaid shakhmat.
U nongïalam jong ki samla pule, u Toniho S. Kharsati uba dei u General Secretary ka NEHUSU, ha ka jingkren jong u, u la ai ka jingithuh ïa ki jingjop bad ïa ki jingeh kiba ka NEHU ka ïakynduh.
Haba pyrkhat ïa ka jinghiar jong ka skulbah dang shen ha ka kyrdan NIRF-naduh napdeng ki 20 sha ka kyrdan kaba 101-150 ha u snem 2024-u la khot ïa ka jingpeit bniah ïalade bad ka jingkut-jingmut lang.
U la ïaroh ïa ka jingïalam jong ka Prof. S. M. Sungoh, Vice-Chancellor (In-Charge), da kaba kdew ïa ki jingkylla kiba lah ban ïohi ha ki jingtei bad ki kam pule-puthi hapoh ka jingïalam jong ka.
U Bah Wandondor R. Synrem, President ka NEHUNSA, u la kyrpad ïa ka jingïatylli ha ka jingtreikam ban wanrah biang ïa ka burom barim jong ka NEHU, da kaba ai burom ïa ka kynhun jong ki samla pule kiba la sdang ïa ka jingkylla kaba bha.
Haba pynkynmaw ïa kijuh ki jingsngew, u Prof. Lakhon Kma, President ka NEHUTA, u la pynpaw ba ka skulbah ka la mad ïa ki jingeh kiba la jan dap shisnem hynrei mynta ka dei ka por ban kiew shaphrang.
U la ai jingïaroh ïa u Prof. N. Saha bad ïa ka Prof. Sungoh kiba la rung ha ki kam nongïalam ha ki por ba eh bad pynïaid ïa ka skulbah da ka jingshlur bad jingkut-jingmut. Ha ka jingkren jong ka, ka Prof. S. M. Sungoh, Vice-Chancellor (In-Charge), ka la kam ba ïa ka bynta kaba eh kaba ka NEHU ka la ïaid lyngba ha kine ki bnai ba la dep hynrei ka la pynpaw ïa ka jingaiti lut jong ki nonghikai bad ki nongtrei kiba la trei palat ïa ka jingkhot jong ka kamram ban pynneh ïa ka jinglong ba janai ha ka jingpule.
“Ngi don ha ka lynti ban ïoh biang ïa ka burom jong ka NEHU,” ka la ong.
Ka la ai ka jingkular ban pynïaid ïa ka skulbah sha ka jingnang-jingstad, ka jingpynwandur thymmai, bad ka jingroi kaba kynthup lang ïa baroh.
U Kongsan, Dr. W. R. Kharlukhi u la ai khublei ïa u Prof. Lamare bad ka kynhun jong u halor ka jingpyllait paidbah ïa ka jingrwai bad u la pynleit jingmut halor ka jingïaid lynti jong ka NEHU lyngba ki jingeh.
“Ki jingeh ki long ki jingkyrkhu” u la ong da kaba pynskhem ba ka jingkhraw bunsien ka mih na ki jingtynjuh.
Shuh shuh u la pynkynmaw ïa la ki jong ki sngi kum u samla pule ha NEHU bad u la pynksan kumno ka skulbah ka pynwandur ym tang ïa ki kam hynrei ïa ka jinglong jong ki samla pule jong ka.
