Shillong, Jymmang 26
Uwei u nongñiah arshaka u la shah kem noh ha ki pulit hadien ba la lap ïa u drok ba suba heroin uba don ka jingkhia haduh 1.95 gram.
Katkum ka khubor na ki pulit la ong ba ha ka Lah Sngi U Blei ha ka por kumba 4 baje janmiet, katba ki pulit pynïaid kali ka Madanrting ki dang talasi ïa ki arshaka ha Sawlad, ki la bat ïa kawei ka arshaka kaba don ïa u registration number ML05-Y-7653 namar ba u nongñiah u khlem deng ïa ka helmet.
La ong ba ha kane ka por, u nongñiah jong kane ka arshaka u la pyrshang ban phet krad da kaba bret ruh sha madan ïa kawei ka pla plastic kaba u la sei napoh ka jaket, hynrei u la shah bat noh ha ki pulit pynïaid kali.
Na ka liang jong ki pulit haba ki la talasi ïa katei ka pla plastic, ki la lap haduh 109 tylli ki bilor rit (vials) ba la thep ïa u suba Heroin.
Mar kumta, la pyntip sha ki pulit ANTF ka East Khasi Hills ban leh ïa kaba donkam bad haba ki la wan poi, bad la kurup noh ïa une u Heroin na ki 109 tylli bilor rit, bad haba la thew, u la don ka jingkhia kaba long 1.95gram.
Ha kaba ïadei bad kane, une u briew uba ñiah ïa ka arshaka uba la tip kyrteng kum u Nimu Chyrmang na Lad Rymbai u la shah kem noh bad la register ïa ka ‘cog case’ lyngba ka thanat Madanriting hapoh ki kyndon 82(05)2025 U/S 21(a)/27(a) NDPS Act.
