Shillong, Jymmang 26
Ka tnat Health & Family Welfare ka Jylla ha ka Lah Sngi U Blei ka la lum ïa ka jingïalang bishar kam bad ka Medical Expert Committee (MEC) na ka bynta ban lum jingtip ïa ka jingpynkhreh ka Jylla ïa ka khlam Covid-19, hadien ka jingsdang kiew biang jong kiba ïoh ïa kane ka jingpang ha kylleng ka Ri.
Ïa kane ka jingïalang la pynïaid da u Sampath Kumar uba dei u Princi-pal Secretary bad Develop -ment Commissioner ka tnat Health & Family Welfare hapoh ka kamra treikam jong u, kaba la wan ïashimbynta da ki stad ka koit ka khiah bad ki nongmihkhmat na ki jaka sumar ka Sorkar bad ki ‘riewshimet na kylleng ka Jylla.
Ha kane ka jingïalang, ka State Surveillance Officer, Integrated Disease Surveillance Programme (IDSP) ka Jylla ka la ai ïa ka jingbatai halor ka jinglong jingman jong ka khlam Covid-19 ha Meghalaya naduh u snem 2020 haduh u Jymmang 2025, ka jingai injek tika haduh mynta bad ki jingpynkhreh ha ki jaka sumar ka Jylla.
La pynpaw ba haduh mynta ym pat don satia kano-kano ka case Covid-19 ne jingdon ki nongpang Covid-19 hapoh ka Jylla hynrei la pynpaw ïa ka jingdonkam ban pynjur ïa ka jingpeitngor lyngba ka jingleh ïa ki tes bad kiwei kiwei ki jingpynkhreh.
La bthah ïa baroh ki jaka sumar ka Sorkar bad ki ‘riew shimet ba kin peit thuh bad pynkhreh lypa ïa ki lad ai jingsumar ïa ka jingpang Covid-19 ba kynthup ïa ka jingbuh lypa ïa ki oxygen, ki jingtei kiba donkam, ki kyndon ban khmih bad sumar ïa ki nongpang Severe Acute Respiratory Infection (SARI), Influenza-like-Illness (ILI) bad ka jingshit met.
Shuh shuh kane ka jingïalang, ka la bthah ruh ba kin shim jingkheiñ biang ïa ka jingdon ki dawai ba kongsan bad pynthikna ïa ka jingtreikam jong ki testing centre ha baroh ki district.
U Principal Secretary u la kyntu ban shim ïa ki lynti jingïada haba ban jur ïa ka jinglong kongsan ban peitngor ïa kiba pang ILI/SARI, shit met khamtam ha ki jaka ba ïarung ïamih bha ki briew kum ha ïew ha hat bad ki ophis bad jaka pule ka Sorkar.
La bthah ruh ïa ki jaka sumar ba kin shong bishar ïa ki kam ki jam bad ban pynthymmai ïa ki Standard Operating Procedure (SOP) bad ban khmih biang ïa ki kyndon kiba treikam bha na ka jingwan lynshop ka khlam Covid-19 ba la dep.
