Shillong, Jymmang 26
Kawei ka longkmie na ka dong Laitdiengsai ha ka shnong Dongdawah ha East Khasi Hills, ka la ai ka jingujor ba ka la shah byrngem pynban ha u briew uba la pan kylliang pisa na ka.
Katkum ka khubor na ki pulit la ong ba katei ka longkmie ka la ujor ba ha u snem 2024, uwei u briew ba la tip kyrteng kum u Moster Kharkongor u la shim pisa kylliang na ka haduh T.1,07,020/-. La ong ba kham hadien, haba katei ka longkmie ka la ong ïa utei u briew ban pynphai noh ïa ka pisa, ka la kynnoh ba u la byrngem pynban ïa ka.
Ha kawei pat ka khubor, kawei ka longkmie ka la ai ka jingujor sha ki pulit pyrshah ïa kawei pat ka longkmie (kaba dei ka dkhot jong ka seng kynthei) na ka bynta ka jingbym lah ban siew ïa ka ram kaba ka la shim kaba T.45,000/- kaba ka la ïoh na ka HDFC Bank bad Axis Bank, Hawakhana, Tura (WGH) ha ka 12 tarik Rymphang, 2024, ha ka kyrteng jong ka seng, ha kaba ka la pynlong ïa katei ka nongujor bad ki dkhot jong ka, ba kin hap shim jingkitkhlieh ban siew ïa katei ka ram.
