Shillong, Jymmang 26
Ki Nongïalam jong ki shnong kiba don hapoh ka Ri-Bhoi District kiba kynthup ïa ka Makdoh, Orlong Shadali bad ka Mawker bad kumjuh ruh ka Raid Makdoh bad ka Raid Nongkhap ki la pynpaw ba kum ki Nongsynshar Shnong ki long kiba la kloi ban ïatreilang bad ai ka jingshaniah ha ka Meghalaya Industrial Development Corporation (MIDC) na ka bynta ban ai ïa ka jaka ha Makdoh, Ri-Bhoi District ban wanrah ïa ka karkhana Green and White Industrial Area hapoh ka thaiñ.
Na ka liang kitei ki Nongïalam Shnong ki la phah ruh da ka shithi sha u Managing Director ka Meghalaya Industrial Development Corpora-tion halor ka jingtyrwa ban shim jaka da ka Meghalaya Industrial Development Corpora-tion Ltd. ha Makdoh, Ri-Bhoi District.
Ha katei ka shithi ba la soi da ki Nongïalam Shnong sha u Managing Director ka MIDC, kitei ki Nongïalam Shnong ki la ong ba wat la ka la don ka jingpyrshah bad jingkhanglad da ki kynhun bapher-bapher kiba la pynthut ïa ka jingtyrwa kaba bha ban ym shah ban seng ïa ka karkhana Green and White Industrial Area ha Makdoh hynrei kum ki nongsoi kiba la soi ha katei ka shithi, ki kwah ban thaw ïa ka jaka karkhana ha kane ka jaka.
“Ngi kwah ban pynpaw ïa ka jingïatylli bad jingshaniah jong ngi bad ka Meghalaya Industrial Development Corporation bad ngi pdiang sngewbha ïa ka jingtyrwa ba la sdang da ka ophis jong phi na ka bynta ban seng ïa ka karkhana kaba heh ka Green and White Industrial Area bad ngi ai ka jingkyrshan kaba thikna bad ngeit skhem ba ki paidbah jong kane ka thaiñ kin ïoh jingmyntoi bad kan don ruh ka jingkiew ha ka liang ka roi ka par jong ka Jylla baroh kawei,” ong ki Nongïalam Shnong.
Kumta, kitei ki Nongïalam Shnong ki la kyrpad ïa ka Meghalaya Industrial Development Corporation ban pynïaid shakhmat ïa kane ka projek bad ban ym shimkhia ne pynsngap ha ki jingpynbor bym don nongrim ki ban long kiba ktah ïa ka roi ka par jong ka Jylla bad ong ba ka jaka kaba ka MIDC ka la ibit ban thaw ïa katei ka karkhana ka lah ban pynïaid noh shakhmat ïa ki kam kumba dei ban long.
