Shillong, Jymmang 26
Ka kynhun jong 10 ngut ki nongïalehkai ba paw ki la pynkhreh ban mihkhmat ïa ka ri India ha ka Asian Athletics Championships 2025, ka ban long ha Gumi, Republic of Korea naduh ka 27 tarik mynta u bnai bad ïa kane ka kynhun la kyrshan da ka Reliance Foundation.
Kane ka lympung ïalehkai ka long u mawjam ba kongsan ha shwa ka Asian Games ha u snem ban wan, kaba ai ïa ka rynsan kaba kongsan bha na ka bynta ki nongïalehkai.
Ki nongïalehkai ki dei shi bynta jong ka prokram ïalehkai kaba heh jong ka Reliance Foundation kaba thmu ban pynlah ïa ki nongïalehkai ka ri India ban ïalehkai bha ha ka kyrdan jong ka pyrthei. Naduh ba la lah ban kyntiew ïa ki sap ïalehkai naduh dangrit haduh ka kyrdan (elite), ka Reliance Foundation ka la ïai bteng ban pynkhlaiñ ha ka liang ki nongïalehkai.
U James Hillier, Athletics Director jong ka Reliance Foundation, u la ong, “Ngi sngew sarong haduh katta-katta ïa ki nongïalehkai jong ngi bad ka jingaiti lut jong ki ban pyni ïa ka sap jong ki bad ban pynlong ïa ka ri India ban sngew sarong. Ngi la pynleit jingmut ym tang ha ka jingpynkhreh ïa ka met hynrei wat ha ka jingkhlaiñ ha ka bor pyrkhat, ban pynthikna ba kin long kiba la pynkhreh na ka bynta kane ka lympung ïalehkai.”
