New York, Jymmang:
Uwei u nongshong shnong ka US bad Germany, u la shah pynngat kyndon noh ha ka ïingbishar na New York ha ka Sngi U Blei halor ka jingsuba don kti ban pynbthei bom ia ka tnat Embassy jong ka US kaba don ha Israel ha kane taïew ba dang shu dep.
Ia utei u briew la ithuh kum u Joseph Neumeyer, 28 snem ka rta, u la shah bat noh ha Israel hadien katei ka jingjia bad la pynpoi biang pat sha United States ha kaba u la shah kem noh hi mar ia poi ha ka Kad Liengsuiñ ha US.
La pharep ruh ba utei u briew u thmu ban thombor sop-sop ia u President ka United States- u Donald Trump.
Kumta, ka Attorney General jong ka US- ka Pam Bondi, ka la iathuh ba ka tnat jong ka kan sa leh ia kaba donkam ban pyntikna ia ka jingshngaiñ jong ka ri bad ruh ban pynshitom ia utei u runar katkum ki kyndon ba iadei bad ka jingleh pynkheiñ aiñ jong u.
Lada shah ka kam un shah rai pynrem, u Neumeyer, u lah ban ngat ha ka jingshah set patok kumba 20 snem kynthih bad ka kuna kaba heh tam kaba lah ban kot haduh $250,000, la ong ka tnat jong ka aiñ.
U Neumeyer, u la leit sha Israel, ha u bnai ba la dep, katkum ka jingpynbna jong ka Justice Department bad ka ophis jong u nongiasaid ain jong ka US, ha New York.
La lap ruh ba ha ka 19 tarik u Jymmang, u la wer ia ki paidbah ba kum ma u hapoh ka Facebook Account jong u, ha kaba u la khot ban “ia snohkti lang bad u katba u dang thang ia ka embassy”.
