Shillong, Jymmang 27
U Bah PT Sawkmie, MLA barim ha ka Sngi Ba-ar u la pynpaw ba donkam ban pynkynmaw biang ïa ka Sorkar ha Delhi ba la lamkhmat da ka Bharatiya Janata Party (BJP) ïa ka jingdonkam ïa ka Inner Line Permit (ILP) hapoh ka jylla Meghalaya.
“Haba peit thuh ha kine ki sngi, i kumba ka Sorkar India ka la klet ïa kane ka mat bad baroh ki la ïakren ïa ka thma India bad Pakistan, hooid ka security ne jingshngaiñ jong ka ri India ka long kaba donkam tam na baroh, hynrei ka dei ka bynta jong ngi ban pynkynmaw ïa ka mat jong ka jaidbynriew,” ong u Bah Sawkmie haba kren sha u nongthoh khubor.
U la bynrap, “Ngi sngewkmen ban ïohi ba ka BJP ka long sngewkhia ban nym ailad ïa ki briew ba nabar ban rung hapoh ka ri India jong ngi, kumjuh ka jaidbynriew jong ngi ruh kan ïeng skhem ban nym ailad ba kin rung katba mon ha ka jylla jong ngi.” U ong ruh, ka jaidbynriew ka barit paid jong ngi ka tip shai ba dei tang ka ILP kaba lah ban khanglad ïa ki poiwir ban rung ha ka jylla jong ngi, kaei kaba nga sngew ka long ba ka ILP ka dei ka ‘permanent solution’ ne ka jingpynbeit bapura ba ki paidbah kin hun.
“Nga sngew ban kyrpad ïa ka State BJP Meghalaya ba kan shimkhia lem ïa kane ka mat ryngkat ki MLA, Myntri ka BJP, nga don ka jingkyrmen ba lada ka seng ka shimkhia, thikna ngin ïoh namar u Narendra Modi kum Myntri Rangbahduh ka ri bad u Amit Shah kum u Myntri ka tnat Kam Pohïing ki burom ïa ka seng ban ïa kiwei.
U Myntri Rangbah ka jylla, Conrad K Sangma lem bad ka Sorkar ki la shimkhia na ka por sha por ïa ka mat ILP bad lada ka State BJP ka ïarap lem, thikna yn sa lah ban pynurlong, pynkut u Bah Sawkmie.
