Shillong, Jymmang 27
Ka kynhun ki nongïalehkai karate jong ka ri India hapoh ka lama jong ka Karate India Organisation (KIO) ki la lah ban pynpaw ïa ka jingtbit da kaba khur lai tylli ki takma ha ka 21st AKF Asian Senior Karate Championship bad 4th AKF Asian Para-Karate Championship 2025 kaba la long ha Tashkent, Uzbekistan naduh 23 haduh 25 tarik mynta u bnai.
Kine ki long u Tarun Sharma uba la khur ïa ka takma ksiar ha ka Para-Karate Individual Kata (Category K-21), kumjuh ka Alisha kaba la khur ïa ka takma rnong ha ka Women’s Individual Kumite -55 kg bad ka Bhuvaneshwari Jadhav kaba la khur ïa ka takma rnong ha ka Women’s Individual Kumite -68 kg.
Ïa katei ka lympung ïalehkai la pynïaid da ka Asian Karate Federation (AKF), kaba la ithuh da ka Olympic Council of Asia (OCA). Ka AKF ka dei kaba long dkhot jong ka World Karate Federation (WKF), ïa kaba la ithuh da ka International Olympic Committee (IOC).
