Shillong, Jymmang 27
Ki nongïalehkai ka ri India ki la khur ar tylli ki takma ha ka sngi sdang jong ka Asian Athletics Championships 2025 ha Gumi, Republic of Korea, ha ka Sngi Ba-ar ha kaba u Gulveer Singh u la khur ïa ka takma ksiar ha ka mareh 10km jong ki shynrang bad u Servin Sebastian u la khur ïa ka takma rnong ha ka mareh 20km.
Ha ka jingïalehkai kawang sum (javelin) jong ki kynthei, ka Annu Rani ka la duh noh ïa ka kyrdan ban khur takma ha ka Lah Sngi U Blei hadien ba ka la wan ha ka kyrdan basaw.
U Gulveer uba la bat ïa ka rekod jong ka Ri India ha ka mareh 3000 mitar, 5000 mitar bad 10000 mitar jong ki shynrang, u la lah ban pyndep 28:38.63 sekhon ha Gumi.
Utei u nongïalehkai ka India, uba la pynïoh biang ïa ka dak jong ka ri ha kaba sdang jong une u snem da kaba mareh 27:00.22 sekhon ha USA, u la lah ban pynliem ïa u Mebuki Suzuki na Japan (28:43.84) bad u Albert Kibichi Rop na Bahrain (28:46.82) kiba la wan ha ka kyrdan ba-ar bad balai. U Sawan Barwal ka India u la wan ha ka kyrdan basaw da kaba pyndep 28:50.53 sekhon.
Shuh shuh u Gulveer un don bynta ruh ha ka jingmareh kaba 5000 mitar jong ki shynrang hadien kane ka jingïakob. U la khur ïa ka takma rnong ha kane kajuh ka jingïalehkai ha ka Asian Championship 2023 ha Bangkok.
Shwa kane ka sngi, u Servin Sebastian u la khur ïa ka takma ba nyngkong jong ka India ha ka Gumi meet da kaba khur ïa ka takma rnong ha ka 20km race walking jong ki shynrang.
Te kumta u Servin u la lah ban pyndep ha ki 1:21:14 sekhon kata hadien ïa u Wang Zhaozhao (1:20:37) na ka People’s Republic of China bad u Kento Yoshikawa (1:20:46) na Japan. U Amit Khatri ka India u wan ba san da kaba pyndep ha ki 1:22:15 sekhon.
Kham hashwa, u Servin Sebastian u la lah ban pynpaw ïa ka jingtbit da kaba u la lah ban pyndep ha ki 1:21:23 sekhon ha ka National Games mynta u snem, katba u Akshdeep Singh u bat ïa ka rekod hapoh ka ri da kaba pyndep ha ki 1:19:55 sekhon.
Kaba sngewtynnad ka long ba ki hynriew ngut kiba kham shakhmat eh ki long u Yutaro Murayama uba la ïoh ïa ka takma ksiar ha ki 1:24:41 sekhon ha ka Asian Athletics Championships 2023, kaba dei ruh ka rekod ïalehkai ba mynshwa. Ka India ka la ïoh ruh ïa ka takma rnong ha ka 20 km race walk jong ki shynrang kaba la long ha Bangkok lyngba u Vikash Singh.
Katba ka nongjop jong ka Asian Games, ka Annu Rani, ka la duna da ka said ban khur takma ha ka javelin jong ki kynthei hadien ba ka la wan ha ka kyrdan kaba saw da kaba kawang 58.30 mitar.
