Shillong, Jymmang 27
Ki lai tylli ki kynhun seng jong ka North-Eastern Hill University (NEHU) – NEHUTA, NEHUNSA bad NEHU-SU ki la kyntu ïa baroh ki dkhot EC ban kiar na kaba leit sha ka jingïalang jong ka Executive Council (EC) ka ban long ha Delhi ha ka 30 tarik u Jymmang.
Kitei ki lai seng ha ka kyrwoh ki la pynpaw ba katkum ki khubor kiba la mih ha ki lad pathai khubor, ka jingkren u Vice Chancellor (VC), u Prof. Prabha Shankar Shukla ban khot ïa ka jingïalang jong ka EC ha Delhi (da ma u) ka long kaba be-aiñ.
“Kum u dkhot ba donburom jong ka Executive Council – ka kynhun ba kongsan jong ka skulbah, uba don ka jingkitkhlieh ban khmih ïa ki jingpynïaid kam jong ka skulbah katkum ka Act, Statute bad Ordinance bad ki kyndon CCS jong ka Sorkar India, ki lai seng ki kwah ban kyrpad ïa phi ba phin ym leit ïashim bynta ha katei ka jingïalang jong ka EC ha Delhi ha ka 30 tarik u Jymmang,” ong ki lai seng.
Ka kyrwoh ka pynpaw ruh ba ki lai seng ki la kren shai ba uno-uno u dkhot uba jied ban ïaid pyrshah ïa kane ka jingkyrpad bad u bym kheiñ snep ïa ka nongrim ba ki la shim, yn ñiew ba u leh pyrshah ïa ka jingmyntoi jong ki samla pule, ki nonghikai bad ki nongtrei (bym dei nonghikai) bad ïa ka skulbah hi baroh kawei.
Katkum ka jingïathuh jong ki, u Prof. Shukla u la leit shuti (Earned Leave) katkum ka jingai jingmut jong u Director, Higher Education, ka Sorkar India naduh ka 15 tarik Naiwieng, 2024 ïa kaba u la pynjlan haduh ka 2 tarik u Lber, 2025 bad haduh kine ki sngi um pat wan mih sha Headquarter jong ka NEHU Campus, Shillong hadien ba la kut noh ka shuti jong u.
Ki la pynpaw ba kane ka ïalam sha ka jingïai bteng ha ka jingbym don ha ka kam ha Headquarter ha NEHU, Shillong la palat 193 sngi (lane palat hynriew bnai).
Ki lai tylli seng ki la kdew ruh ba ïa ka kaiphod jong ka ‘Inquiry Committee’ halor ki kam u Prof. Shukla ym pat shym la pynpaw paidbah da ka tnad pule puthi ka Sorkar Pdeng.
Ha kajuh ka por, ki lai seng ki la ong ba u Prof. Shukla u la pynmih ïa ki jingkren kiba pyntroiñ ïa ki jingïamir jingmut bad ki jingïateh kular ba ki nongshim bynta ka NEHU ki la don bad ki dkhot jong ka kynhun kaba la wan na ka tnad pule-puthi ka Sorkar Pdeng, ha ka 22 tarik Jymmang, ha kawei ka liang kaba lah ban wanrah biang ïa ka jinglong-jingman kumba ju long ha kane ka skulbah.
Shuh shuh, ki la pynpaw ba u Prof. Shukla u la pyrshang biang ban pynjah burom ïa palat 135 ngut ki dkhot jong ka ‘Academic Council’ kiba la wan sha ka jingïalang kaba la long ha ka 21 tarik Jymmang kaba la pynïaid da ka Prof. S. M. Sungoh (Acting Vice Chancellor) katkum ka NEHU Statute da ki jingkren ba khlem nongrim jong u.
“Lah ban kdew ba u Prof. Shukla u don ha ka shuti bad um pat shym la pynïasoh sha ka kam jong u ha ka Headquarter ka NEHU ha Shillong la palat hynriew bnai mynta, kaba pynkheiñ ïa ki kyndon shuti jong ka NEHU Act bad Statutes & ka Sorkar India – ka jingïalang EC ba la khot da ma u ha Delhi ka long, namarkata, kaba be-aiñ,” ki la ong.
