Shillong, Jymmang 27
U Myntri Rangbah ka Jylla, Conrad K. Sangma u la plie paidbah ïa ka madan ïalehkai phlang plastik (Synthetic Artifi-cial Turf) ha madan Rongrenggre, Williamnagar bad kaba nyngkong eh ha East Garo Hills.
Kumba ka long mynta ki la don haduh 25 tylli ki madan kiba kum kitei ïa kiba la siang ha ka Jylla bad palat 35 tylli la dep mang da ka jingthmu ban kynjoh shaduh palat 50 tylli. Kane kan long ka jingmyntoi kaba khraw na ka bynta ki khynnah jong katei ka thaiñ.
“Kane kan long ka jingkyntiew kaba khraw sha ka thong jong ngi ban pynlong ïa ka Jylla kaba paw ha ka jingïalehkai phutbol jong ka ri India,” ong u Sangma.
Haba kren ha katei ka jingïalang, u Sangma u la pynpaw ba ha kine ki hynñiew snem ba la dep, ka sorkar ka la pynleit jingmut ha kaba ïalam ïa ki samla jong ka Jylla lyngba ki polisi bapher bapher bad ki prokram bapher bapher nalor ka jingpule, da kaba pynbna, “Kawei kaba kham kongsan ka dei ïa ki samla jong ngi, bad lada ngi lah ban ai ïa ki ka lad ka lynti kaba bha, kan pynlong ïa ki ban pynmlien ha ki kam ïalehkai bad ba kin long kiba paw ha ka ri.”
U Myntri Rangbah ka Jylla u la kdew ba ka sorkar ka dang trei shitom ha kiba bun ki liang, kynthup ïa ki jingïalehkai, bad pynbna, “Ha u snem 2027, ha ka sien kaba nyngkong, yn pynlong ïa ka National Games ha Meghalaya,” da kaba bynrap ba ki jingtei jong ki jaka ïalehkai jong ka Meghalaya ki dei ban ïahap bad ki kyndon jong ka ri, ha kaba ïa ka Meghalaya Games ruh la pynlong ha ka thaiñ. U la pynkynmaw ïa ka jingïa-lang jong ka kynhun myntri ha u snem 2018 ha Tura ha kaba la thaw ïa ka Sports Policy, da kaba batai ba ka jingroi ka nangkiew ha ka jingïaleh-kai bad ba ka jingnang jingstad bad ka jingpyndonkam ïa ki sap ka long kaba kongsan na ka bynta ka jingroi jong ka jylla.
Ha katei ka sngi la ïadon lang u Marcuise N Marak, Myntri ka tnat Public Health Engineering (PHE), u Jim N Sangma, MLA ka Rongjeng bad u R.P Marak (IAS), Deputy Commissioner ka East Garo Hills.
