Guwahati, Jymmang:
Ka jingkulmar ka la mih ha ka nongbah jong ka Manipur, ha Imphal, ha ka sngi U Blei, ha kaba ki bor pahara, ki la siat da ki bom pynsat khmat bad ki bom thok, na ka bynta ban pynpra ïa ki nongïakhih kiba ïaid sha ka Raj Bhavan.
Kitei ki nongïakhih ki long kum ka jingkynthoh halor ka jingkhot jong ka seng Meitei Coordinating Committee on Manipur Integrity (COCOMI), kaba la bitar lep ïa u Lat ka jylla u Ajay Kumar Bhalla namar ba um shym la pynmih ïa ka jingpanmap halor ka jingjia kaba dang shen ha kaba ïadei bad kawei ka bos kaba la pynïaid da ka sorkar.
Katkum ki khubor, la ong ba kawei ka kynhun ki lad pathai khubor kaba leit sha Ukhrul da ka bos ban pyni ïa ka tamasa Shirui Lily la kynnoh ba ki la shah bthah ha ki bor pahara ha lynti ban buhrieh ïa ki jingthoh “Manipur State Transport” kiba la thoh ha katei ka kali.
Ka COCOMI ka la pynrem ïa kane kum ka jingleh kaba “pynjah burom ïa ka jinglong, ka jingsarong, bad ka jingburom jong ka Manipur” bad naduh katei ka por ka la pynbna ïa ki prokram jingïakhih kiba bun jait, kynthup ïa ka jingïakhih paidbah ban ym kohnguh bad ka jingpynsangeh paidbah ïa u Lat.
Ha ka jingïahap bad kane ka jingïakhih, ki nongïakhih ki la ïaid paidbah sha ka Raj Bhavan ha ka Sngi U Blei hynrei ki la shah khanglad ha ki bor pahara, kaba la pynlong ïa ka jingïakynad.
Ha ka jingïahap bad kane ka jingïakhih, ki nongïakhih ki la ïaid paidbah sha ka Raj Bhavan ha ka Sngi U Blei hynrei ki la shah khanglad ha ki bor pahara, kaba la pynlong ïa ka jingïakynad.
La ïathuh ba 5 ngut ki nongïakhih ki la mynsaw bad la shah sumar ha hospital hadien katei ka jingïaleh pyrshah.Ka COCOMI ka la pynpaw ïa ka jingsngewsih kaba jur halor ka jingleh jong ki bor pahara.
“Ka jingpyndonkam ïa kum kine ki lad jingïada paidbah kiba shyrkhei pyrshah ïa ki riew paidbah ki bym don tiar, kynthup ïa ki kynthei, ka long kaba sngewkhia shibun,” ong ka seng, da kaba dawa ban sangeh noh mardor ïa kum kine ki kam “pyrshah” bad ban bishar bniah ïa ki kyndon pahara.
Ha kajuh ka por, ka kynhun jong ka COCOMI kaba don hynñiew ngut ki dkhot ka la buh ban leit sha New Delhi mynta ka sngi na ka bynta ban ïakynduh ïa ka tnad korbar ri ha ka sngi Ba-ar.
Kane ka jingïalang kan thmu ban buddien ïa ki rai ba la shim ha ka jingïalang jong ka Manipur People’s Convention kaba la long ha Imphal ha ka 3 tarik, Jymmang 2025, kaba rakhe ïa ka jingdap ar snem jong ka jingïakynad hapdeng ki jaidbynriew.
Ka COCOMI ka la pynpaw ba ka mat kan kynthup ruh ïa ka jingdawa ban panmap paidbah na u Lat na ka bynta ka jingsngewthuh ba la lehbeiñ ïa ki paidbah jong ka Manipur, kumjuh ruh ïa ka jingphah iehnohkam ne pynkynriah kam mardor ïa u Chief Secretary, u Director General of Police bad u Security Advisor, baroh na ki la shim ba ki long “ki bym lah ban leh ei ei” bad “ki don ka jingkitkhlieh pyrshah ïa kata ka jinglong jingman.”
