Shillong, Jymmang 27
Ka thaiñ Mawkynrew kat nang mih ki sngi ka la nang pynmih shuh shuh ki jaka jngohkai kiba itynnad bad kiba khring ïa bun ki nongwan jngohkai pyrthei ym tang na ka jylla hynrei na kiwei-kiwei pat ki bynta ka Ri India bad na shabar ri ruh.
Napdeng ki jaka jngohkai ba paw khmat kum ka Laitlum, Nongjrong, Syntung bad Mawlyngot, mynta la paw sa ka jaka jngohkai ha Thangsning ha kaba kane ka shnong ka don ïa ka Kshaid Lwai kaba dang dep pynbiang pynbit ïa ki lynti ïaid kjat ha ki khyndiat bnai ba la dep ha ka mang tyngka ba 94 lak.
Kane ka jaka ka pajih tang khyndiat na shnong Thangsning bad ka dang donkam pat ïa ka surok ban poi haduh katei ka jaka.
Dang ha ka taïew ba la dep, u Bah Paul Lyngdoh, Myntri ka tnat jngohkai pyrthei ka Sorkar Jylla ha ryngkat u Bah Banteidor Lyngdoh, MLA ka Mawkynrew ki la wan ban jngoh ïa katei ka kshaid ha ryngkat ki ophisar, ki nongïalam shnong lem ki trai jaka nalor kiwei pat.
U Bah Paul u la ai jingkular ban pynmang tyngka ban shna ïa ka surok 1 kilometer duna ban pynsuk ïa ka leit ka wan haduh katei ka jaka jngohkai.
U Myntri u la ong, ka jingkhuid ka um bad ka jingitynnad ka sawdong sawkun ka pynlong ïa kane ka jaka jngohkai kaba itynnad bad kaba biang paka ban pynïasoh bad ka mariang.
“Kaba la pynlong ïa ka jingleit kaba kham kyrpang shuh shuh ka long ban ïohi haduh katno la pynneh pynsah ïa kane Kshaid bad ka tnat Tourism ka shimkhia ban pynneh pynsah ïa ka jingitynnad jong kane ka jaka da kaba pynbha ïa ki jingdonkam na ka bynta ki nongwan jngohkai pyrthei”, la ong u Bah Paul.
