Shillong, Jymmang 27
Ki pulit ka Sohra Civil Sub Division ryngkat bad ki pulit ka tnat SDRF bad ki nongkitkam shnong ka Sohrarim ki la leit rung sha ka khlaw bad ki riat kiba don ha Sohrarim ha ka 27 tarik Jymmang 2025 ban leit wad ïa ki shikurim na Indore, Madhya Pradesh kiba la jah rngai haba ki leitkai sha Sohra.
Kine ki shikurim kiba la jah rngai ki long ka Sonam Raghuvanshi bad u Raja Raghuvanshi kiba la jah naduh ka 22 tarik mynta u bnai, katba ka arshaka (scooty) kaba la shim wai na Shillong la lap da ki nongshong shnong ha ka por mynstep ka 23 tarik Jymmang hajan Golden Pines Dhaba kaba don ha Sohrarim.
Kane ka jingleit wad ki pulit sha khlaw bad riat ha Sohrarim ka dei namar ki la lap ïa ka scooty ba ki ñiah hajan ka Golden Pine Dhaba.
Haba ki pulit kiba don 60 ngut duna eiei ki la rung shapoh khlaw bad hiar ïa ki riat ki ram, ki la hap ban sangeh shwa shipor namar kim shym la lapksai eiei.
Ban tip kham bniah ïa kane ka jingleit wad ki pulit ha khlaw bad ka riat ha Sohrarim, la ïoh ban ïakren bad u Secretary Shnong Sohrarim, Bah Païa Kharpuri.
U Bah Païa u la ïathuh ba kane ka jingleit wad sha khlaw ha Sohrarim ka dei namar ba la lap ïa ka scooty hajan katei ka dhaba.
U la pynpaw ka jinglyngngoh ïa ka shnong bad ki pulit ba ka scooty ka ïeng harud surok ym don ba wan shim hynrei ynda ki nongshong shnong ki la ïohi ïa ka scooty ki lap ba u don lang u shabi.
U la pyntip ba ki pulit ki la wan wad ïa kane ka khlaw naduh janmiet Sngi U Blei, nangta ki la wan wad mynha ka Sngi Nyngkong bad bteng biang ha ka Sngi Ba-ar.
Shuh shuh, u la ïathuh ba namar ba kim shym la lapdien eiei, ki pulit ki la mih noh na kane ka shnong ban leit wad biang na jaka ba ki sah nyngkong sha Mawlakhiat.
