Shillong, Jymmang 27
Ka jingjia shah leh khlemakor kawei ka khynnah skul ha uwei u samla briew uba la kah durkhmat ïalade kaba la jia ha ka shnong Umsohsun ha ka por 6:30 mynstep jong ka 23 tarik u bnai Jymmang, 2025, ha kaba utei u briew u la khyllied kynsan ïa ka skad jong katei ka khynnah skul bad ring ‘video’ ïa ka, bad kane ka jingjia ka la pynpar ñiangkhriat ïa kiba bun ki paidbah khamtam eh ïa ki kmie-ki kpa jong ki khynnah kiba don ïa ki khun kynthei.
Kum ban shu pynkynmaw hangne ba ha ka 24 tarik mynta u bnai, kawei ka durkhih ka la saphriang ha ki rynsan ‘social media’ ïa kaba la ïoh ban ring da ki kor CCTV Camera na kawei ka ïingsah kaba don ha Umsohsun ha kaba ha kane ka durkhih, utei u briew uba riam khuid bha ha ryngkat ka jingphong ïa ka jingkah durkhmat, u la hiar bad kiew na ki mawkyndon kiba don ha Umsohun hajan ka YMCA Mawkhar, u la leit ban khyllied kynsan ïa ka skad jong kawei ka khynnah kynthei kaba dang thmu ban leit sha skul bad ban ring ‘video’ ïa ka bad ym tang kane ka khynnah kaba la ngat ha kane ka jingshah leh khlemakor hynrei la sakhi ruh ba ha katei ka durkhih kaba jrong kumba 1 minit 50 sekhon, kawei pat ka khynnah ka la phai shadien ban peit ïa u, lehse kane ka khynnah ruh ka la shah leh kumjuh kumba shah leh katei kawei ka khynnah.
Haba ïoh ban ïakren bad u Bah Tribelget Dkhar uba dei u Rangbah Shnong ka Umsohsun, u la ong, kane ka jingjia ka la pynkyndit bad pynsngewsih shikatdei eh ïa ka Dorbar Shnong Umsohsun baroh kawei namarba kum kine ki jingjia leh khlemakor pyrshah ïa ki kynthei bad khynnah kim ju jia koit hapoh ka shnong.
U Bah Tribelget u la ong, ka shnong ka pynrem jur ïa kane ka jingleh khlemakor jong une u briew kaba la pynbudnam ïa ka jaidbynriew bad kumjuh ruh ïa ka shnong-ka thaw baroh kawei.
“Kum kine kiei-kiei ki jingjia kim ju jia bad wat ban ktah kti ne ban kynshleiñ ïa ki khynnah skul ruh kim ju jia. Ngi kum ka shnong ngi sngewsih ban ïohi kum kato ka jingjia namarba ka pynbudnam ïa ka jaidbynriew Khasi bad ïa ka shnong-ka thaw,” ong u Rangbah Shnong.
Da kaba kyntu ïa ki paidbah ba kin pyntip sha ki bor ka aiñ lada ki ithuh ne ïoh jingtip eiei shaphang utei u briew bad bynrap ba kum ki paidbah nongïaid-nongïeng ruh kim dei ban ailad haba ki ïohi ïa kino-kino ki briew kiba leh khlemakor ha lynti-syngkieñ pyrshah ïa ki kynthei ne ki khynnah.
U la ïathuh ruh ba ki bor pulit ki la leit ban tohkit bad ban kylli ïa kitei ki khynnah kynthei kiba la ngat ha kane ka jingshah leh khlemakor ha ryngkat ka jingthwet jur ïa utei u briew bad ong ruh ba katei ka khynnah kaba la ngat ha kane ka jingjia ka dei kaba shong ba sah ha ïing ki briew ha Umsohsun ban ïarap ïa ki bad ka dei ruh ka khynnah kaba leit skul step ha ki thaiñ Mawkhar.
