Shillong, Jymmang 27
Ki Nongïalam jong ka Awaken India Movement (AIM), Meghalaya State Council ha ka Sngi Ba-ar ka 27 tarik u Jymmang, 2025, ki la leit ban aiti da ka dorkhas sha u CEM ka KHADC, Bah Shemborlang Rynjah bad ruh sha u Chairman ka KHADC, Bah Strong Pillar Kharjana, lem bad kiwei pat ki nongïalam jong ka KHADC ban pyrshah ïa ka jingpynlong kongsan halor ka Aadhaar ha ki jaka kiba dang hapoh ka Khyrnit Hynriew.
Haba kren sha ki lad pathai khubor, u Bah Banshai Marbaniang kum Chairman ka AIM Meghalaya State Council, u la ong ba ha katei ka dorkhas, na ka liang ka kynhun ka kyntu ïa ka KHADC bad ïa baroh ki ADC kiba treikam hapoh ka Khyrnit Hynriew jong ka Riti Synshar ka ri India ha Meghalaya ba kin mynjur da ka rai kaba pura (Resolution) halor kumno ban pyrshah ïa ka jingpynrung kyrteng (mandatory enrolment) bad ka jingpynïasoh ïa u Aadhaar na ka bynta ki nongshong shnong kiba sah ha ki jaka ba la ïada lyngba ka Khyrnit Hynriew.
Kitei ki Nongïalam ka kynhun ki la pynpaw ka jingsngewkhia kaba jur ba ka Sorkar Meghalaya kam shym la burom ïa ka rai jong ka Supreme Court, kaba kren shai ba u Aadhaar um dei ban long uba kongsan na ka bynta ki nongshong shnong jong ki jaka ba la buh ha ka Khyrnit Hynriew.
Ki nongïalam jong ka AIM kiba dei ki jaidbynriew riewlum Khasi ki la kdew shai ba ka Sorkar Jylla ka la leh ïa ka jingpynkheiñ ïa ka rai badonburom lyngba ka ïingbishar ba ha khlieh jong ka Ri India kaba la tip kum ka Supreme Court bad ïa ka hok jong ka Riti Synshar ka Ri India (Indian Constitution).
Haba pynpaw halor kane ka mat, ki Nongïalam ka AIM ki la pynpaw ba ka Supreme Court jong ka Ri India, ha ka rai ba kongsan jong ka, ka la pyllait ïa ki nongshong shnong kiba sah ha ki jaka ba don ha ka Khyrnit Hynriew na ka jingpynrung kyrteng jubor lyngba u Aadhaar bad dei ban pynrung kyrteng katkum ka mon kaba laitluid khlem da ktah ïa ka jingpynduh ïa ka jingïoh rashon lane kiwei kiwei ki skhim Sorkar.
Ki la kynnoh ba ka Sorkar Jylla ka la pynkheiñ ïa baroh ar ki hukum jong ka Supreme Court bad ïa ka mynsiem jong ka Riti Synshar paidbah da kaba pynbor ban pynrung ïa u Aadhaar na ka bynta ban ïoh ïa ki skhim Sorkar ba kongsan, kynthup ïa ka Public Distribution System (PDS) bad kiwei kiwei ki jingmyntoi jong ka bha ka miat halor ka imlang sahlang.
“Ka jingpynbor jong ka Sorkar Jylla ïa u Aadhaar kam dei tang ba ka long beaiñ hynrei ka buh jingma ruh ïa ka hok bad ka jingim jong ki nongshong shnong riewlum khamtam ïa ki briew kiba duk,” ong u Bah Banshai Marbaniang.
Bun ki longïing ki la shah kyntait ban ïoh ïa ki jingbam rashon bad ki hok jingïarap tang namar ba kim don ïa u Aadhaar card, wat hapdeng ka jingbthah kaba shai jong ka ïingbishar ba ha khlieh duh jong ka Ri India ka Supreme Court.
Kitei ki nongïalam ki la khot ban leh mardor katkum ka dorkhas halor ka KHADC bad baroh ki ADC ban mynjur ïa ka rai kaba pura kaba pyrshah ïa ka jingpynïasoh Aadhaar da kaba bthah ïa ki nongshong shnong ha ki jaka ba la buh ha ka Khyrnit Hynriew.
Kumjuh, ban kyntu ïa ka Sorkar Jylla ban sangeh noh mardor ïa baroh ki kam kiba pynlong ïa u Aadhaar uba donkam ban ïoh ïa ki skhim Sorkar da kaba pynthikna ïa ka jingïada ïa ki hok riti synshar paidbah bad ban ïada ïa ki jingmyntoi jong ki jaidbynriew riewlum kiba don hapoh ka Khyrnit Hynriew.
Na ka liang u CEM bad u Chairman ka KHADC ki la pynthikna ïa ka kynhun ba ka District Council kan shimkhia kyrkieh ïa kane ka kam bad kan ïasyllok bad ki riew shemphang ha ka liang ka aiñ ban pynthikna ba ka hok jong ki Khasi bad kiwei-kiwei ki jaidbynriew riewlum kan ïada.
