Shillong, Jymmang 27
Ka St. Nanak ka la long ka lahduh ha ka Inter School Under-18 Cricket Tournament 2025 ba la pynïaid da ka Shillong Cricket Association, hadien ba ka la lah ban pynliem noh ïa ka St. Anthony’s Higher Secondary School da 16 run ha ka Sngi Ba-ar.
Ha kane ka jingïakhun final kaba la long ha madan Polo, ka St. Nanak hadien ba la jop kynting pisa, ka la shimti ban tied nyngkong ha kaba ka la ïoh 117 run bad shah pynhap 10 wiket ha ki 20 over. U Ganesh Kumar Ray u la tied 77 run na ki 67 bol bad u Gautam Prasad u la ïoh 13 run na ki 18 bol. Katba u Samelawan Nongkseh u la shim 3 wiket na ka bynta ka St Anthony’s.
Haba wan beh ïa ka thong ba la buh da ka liang pyrshah, ka St. Anthony’s ka la tied tang 101 run bad shah pynhap 10 wiket ha ki 18.3 over. U Abhinav Khanal u la ïoh 34 run na ki 45 bol. Katba u Binay Kumar Mahato u la ïoh 4 wiket na ka bynta ka St. Nanak. Ïa ka nam ‘Player of the Match’ la ïohpdiang da u Ganesh Kumar Ray uba la tied 77 run.
