Shillong, Jymmang 27
Haduh palat 500 ngut ki suba nong Bangladesh la ong ba ki la wan rung shapoh u pud u sam jong ka India, kaba la pynlong pat ïa ki shipai Border Security Force (BSF) ban hap siat pynma sha suiñ.
Katkum ka khubor na ki pulit la ong ba u Inspector, Dhananjay Kr., BOP Commander of Cheragaon, 1st Bn., BSF kaba hap hapoh ka South West Khasi Hills u la ai ka jingujor ba ha ka 20 tarik mynta u bnai ha ka por kumba 10.15 mynstep, ki suba nong Bangladesh kiba don kumba 500 tam ki la rung shapoh u pud u sam jong ka India.
Ha kane ka jingujor, la ong ruh ba haba la ïohi ïa kane, na ka liang jong ki shipai BSF ruh ki la mihkhmat ban ïaleh pyrshah ïa kine ki nongrung tuh bad ha kaba ki la siat pynma ruh sha suiñ na ka suloi jong ki.
Pynban, la ong ba wat la siat pynma sha suiñ bad ai ka jingmaham, kine ki suba nong Bangladesh kim shym la sngap hynrei ki la tur beit shaduh jan jong ka surok bad kane ka la pynlong ïa ki shipai BSF ban siat pynma biang sha suiñ haduh saw sien kynthih bad hadien kane, kine ki briew ki la phet krad noh na kane ka jaka. La ong ba ha kane ka jingjia, kam shym la don satia kano-kano ka jingjia ne ka jingmynsaw briew.
