Tura, Jymmang 27
Uwei u nongtrei mon sngewbha ha ka imlang-sahlang bad u nongpyndonkam ‘Facebook’ u la ujor sha ka DGP ka Jylla da kaba pynpaw ba ma u lem bad ka ïing ka sem jong u ki la shah byrngem-byrsit ban ngat ha ki jingeh kiba shyrkhei namarba u la buh ïa ka khubor jong kawei kot khubor ha ka ‘Facebook Account’ jong u.
Katkum ka jingujor, ka khubor ba la pynmih da kawei ka kot khubor Phareng ha kaba ïadei bad ka jingshah kem jong 2 ngut ki briew kiba la pynmih ïa ki dur-khih kiba kyrshan ïa ka Pakistan bad kiba la pyrta ïa ki kyntien ba kyrshan ïa ka Pakistan, la buh da u nongujor, u Flaming B. Marak ha ka 17 tarik u Jymmang ha ka ‘FB Account’ jong u, ‘Mark Flaming’.
Haba jubab ïa katei ka khubor kaba la buh, uwei u nongpyndonkam rynsan lad pathai u bym lah ban ithuh satia uba don ka kyrteng ‘Salgro Salaram’ u la byrngem ïa u ban “peit bha” da kaba ong “phi lah ban lait khlem jingmynsaw hynrei ka ïing ka sem jong phi kam don jingïada”.
Namar ka jingtieng ïa ka jingma kaba lah ban mih, u Marak uba shong ba sah ha Asananggre hajan Tura, u la thoh ïa ka jingujor sha ka DGP ka Jylla ban phah tuklar kumjuh ban sdang ïa ka jingtohkit halor katei ka bynta bad ban leh ïa kaba donkam kumba dei pyrshah ïa utei u runar.
