Shillong Jymmang 27
U MP Rajya Sabha ka jylla, Dr WR Kharlukhi ha ka Lah Sngi U Blei u la pynpaw ïa ka jingskhem jingmut ba ki shipai Border Security Force (BSF) ki la biang eh ban tehlakam ïa kano-kano ka jingjia ha ki thaiñ khappud bad ka ri Bangladesh ban pynthikna ïa ka jingshngaiñ bad jingïada ïa ki paidbah ka Jylla bad ïa ka ri baroh kawei.
“Ki Border Security Force ki don ban shimkhia ïa kano-kano ka jingjia bad ngam ïohi ban don kano-kano kaba ngi dei ban khuslai,” ong u Dr Kharlukhi haba ïakren bad ki nongthoh khubor.
Shuh shuh u la ong, “Ïa nga hi, nga tharai ba kan bha shibun ban kylli na ki briew kiba sah ha ki thaiñ khappud namar kin tip kham bha hynrei na kaei kaba nga ïohi na jngai ka long ba ki don hangtei ban leh ïa la ka kamram bad nga kyrmen ba ki la trei ïa ka kam ka jong ki”.
U Dr Kharlukhi u la pynpaw ba ka ri Bangladesh ka don hapdeng jong ka kynrum-kynram bad u la ong, “To ngin ïa peit shwa nyngkong. Katkum ka jingsaphriang, nga la ïohi ba ki la ong ba u Chief Adviser u la kwah ban iehnoh ïa ka kam, kan ym lah ban jia. Nga tharai ba kin ïaleh ban pynneh ïa ka jinglong-jingman. Kumta ngin sa ïa peit, ngin ïa ap bad ban peit ïa ka ban sa jia”.
