Khliehriat, Jymmang 27
Ka ophis u Superintendent of Police ka East Jaiñtia Hills District, ka la kyntu ïa ki ‘riew paidbah ban kiar na kaba jubab ïa ki phone ne message ba ïohpdiang na ki nombar kiba dei nabar ri.
U la pyntip ba kiba bun ki account Facebook, Instagram, Whatsapp ki leh ïa ki kam pyrshah aiñ kum ka kam thok ha ka liang ka pisa tyngka, nalor kiwei kiwei ki kam thok kam shukor.
U SP u la pynbna ruh ïa kawei ka Facebook Account Profile kaba leh ïa kum kine ki kam bad phone ïa ki briew da u number Number +234-90393727219. Lada don kino-kino kiba ngat ha ki kam thok lyngba ka internet ne Cybercrime ki lah ban pyntip da kaba phone ha une u number 1930.
Shwa kane u Ma Benedic Salahe, uba na ka shnong Shyrwang ha East Jaiñtia Hills District, u la buh da ka jingujor ha ka ophis jong u Superintendent of Police ka East Jaiñtia Hills District, u Giri Prasad, IPS halor ka jingshah pyndonkam bakla ka facebook account ka jong u.
Na ka liang u SP ruh u la shimkhia halor kane ka kam bad mar-mar hi la buh ki jingpynbna ha ka Facebook Account jong ka East Jaiñtia Hills Police khnang ba ki paidbah kin lait na kino-kino ki jingshah pynngop ha ki kam thok kam shulor.
