Williamnagar, Jymmang 27
U Myntri Rangbah ka Jylla, Conrad K. Sangma ha ka Sngi Ba-ar u la ong ba ka Tura Secretariat kan treikam kum ka “Additional Secretariat” na bynta ki paidbah ka Ri-lum Garo.
Haba kren ha ka prokram ha Samanda bad Williamnagar, u Myntri Rangbah u la plie paidbah ïa ka jingdro dur (architectural drawing) jong ka Tura Secretariat.
“Ha kaba sdang, ïa kane ka projek la buh jingmut ïa ka kum ka Mini Secretariat, hynrei ka Sorkar ka sngew ba dei ban pynbha ïa ki jingtei khnang ban kynthup lang ïa baroh ki ophis jong ki tnad treikam, ka ophis u Myntri Rangbah, ka ophis jong ki Myntri Sorkar bad ki heh ophisar,” u la ong, haba pynpaw ba ka Tura Secretariat kan pyntikna ban pynpoi ïa ki jingshakri ka Sorkar sha ki paidbah ka Ri-lum Garo.
“Ki briew na Ri-lum Garo ki hap ban leit sha Shillong na bynta ki kam Sorkar bapher-bapher. Ka jingthmu jong ka Tura Secretariat ka long ban pyntikna ba ki briew na Ri-lum Garo kin ïoh ban phah ïa ki kot ki sla jong ki da kaba suk na bynta ban pynïaid shakhmat ïa ki kam ki jam ha Tura hi”, u la bynrap.
Hashuwa, ka jingkheiñ haba ïadei bad ka jinglut na bynta kane ka Mini Secretariat ha Tura ka long T.30 klur, kaba mynta pat, la antad ba kan long palat T.150 klur.
U la pyntip ruh ba ka Tura Convention Centre kan don marjan bad ka Tura Secretariat, kumba la pyni ha ki dur ba la shna ha ka rukom jong ka ‘3D’.
Shuh shuh u la bynrap ba ïa ka kylla banyngkong jong ka Tura Secretariat yn pyndep ha u bnai Kyllalyngkot, 2027.
