Jowai, Jymmang 28
Ki arphew ngut samla kiba la pyndep ïa ka jinghikai ban long kum ki nonglam lynti ne guide ha ka shnong Nartiang ryngkat ka jingïatreilang ki nongtrei jong ka Society for Urban and Rural Empowerment (SURE) ki la ïalam ïa ka Kong SD Shylla, District Tourism Officer bad u Lambourmi Suchen District Skill Development Officer ka West Jaiñtia Hills sha ka kper mawbynna ban batai ïa ki shaphang ka jingkongsan jong kine ki mawbynna bad Ma Jayantee Temple kaba don ha kane hi ka shnong.
Ka SURE da ka jingkyrshan ka tnat District Tourism Officer bad u District Skill Development Officer ka la ai jinghikai ïa ki arphew ngut ki samla na kane ka shnong ha kaba ïadei bad ka kam kumno ba kin trei kum ki nonglam lynti ban ïarap ïa ki nongwan jngohkai pyrthei kiba wan jngohkai sha ka shnong Nartiang.
Ka Kong SD Shylla ka la ong ba ka Nartiang ka dei kaba donbok ha kaba ka don ïa ki jingtei mynbarim (heritage) bad ruh ïa ki temple kiba lah ban kyntiew ïa ka kam ‘pilgrimage tourism’. Ka la pynkynmaw ruh ïa ki samla ba ki guide ki dei kum ki khmat jong ki nongjngohkai pyrthei bad ki dei ban khmih bha ruh ïa ka jingshngaiñ (safety bad ka security) jong ki nongjngohkai.
Kala ban jur ïa ka shnong bad ruh ïa ki guide ba ki dei ban pynlong ïa ka shnong kaba khuid namar ka khuid ka suba ka dei ka kongsan ha ka ban khring ïa ki nongwan jngohkai pyrthei.
U Ma Lambormi Suchen u la ïaroh ïa ka shnong hapoh ka jingïalam jong u Waheh Shnong u C Myria ba kala ai ka jingkyrshan ïa ki ophis ban pynlong ïa kane ka jingai jinghikai. U la kyntu ruh ïa ki samla ba kin pyndonkam hok ïa ki jinghikai kaba ki la ïoh khnang bad kan long ka lad ïohkam ïohjam ïa ki.
U Dr HH Mohrmen u la pynpaw ba u la don ka jingïadei kaba jan bha bad kane ka shnong naduh ki por kiba mynshuwa bad ka jingai jinghikai ïa ki samla ka dei kawei na ki jingangnud ka jong u. U la ong ruh ba u sngewkmen ba tip ba kine ki samla ki la sdang ban ïoh guide tang hadien katto katne sngi bala dep ai jinghikai ïa ki.
Kiwei de kiba la ai jingkren ki long ka Kong Niwanka Shylla, Project Coordinator ka SURE bad Kong Luminary Liam ha ka jingïalang kaba la pynïaid da ka Sliang Suting na ka SURE.
