Rongjeng, Jymmang 28
U Myntri Rangbah ka Jylla, Conrad K. Sangma ha ka Sngi Balang u la plie paidbah ïa ki Block Development Integrated Complex (BDIC) kiba la shna thymmai ha Songsak bad Dambo Rongjeng, East Garo Hills District.
Ha kane ka sngi, la don lang u Myntri ka tnad Community & Rural Development (C&RD), u Abu Taheer Mondal, Myntri ka tnad ka PHE, Marcuise Marak, bad ki MLA – Jim Sangma bad Rupert Momin.
Haba kren ha kane ka sngi, u Myntri Rangbah u la pynpaw ïa ka jingangnud jong ka Sorkar ban kyntiew ïa ka jingsynshar ha ki kyrdan ba sha trai.
“Ha ka por ba ka Sorkar MDA ka la shimti ha u snem 2018, kiba bun ki C&RD Block ki treikam hapdeng ki jinglong-jingman kiba duna haduh katta-katta. Bun ki Block Development Officer (BDO) kim don wat tang ki jaka treikam kiba biang”, u la ong.
“Da kaba ithuh ïa ka bynta kaba kongsan jong ki ophis ha ka kyrdan jong ki Block ha kaba pyntreikam ïa ki kam pynroi nongkyndong, ngi la pynmih ïa ka saiñdur kaba bniah ban kyntiew ïa ki jingtei jong baroh ki C&RD Block. Ngi la sdang da 6 tylli ki Block, bad mynta, ïa kane ka sienjam la kyntiew sha baroh 56 tylli ki Block ha kylleng ka Jylla,” u la bynrap.
U Myntri Rangbah u la pyntip ba ïa ka jingtei na bynta kine ki Complex bathymmai la bei tyngka na ka skhim Special Assistance to States for Capital Investment (SASCI) kaba la kot sha ka T. 120 klur – ka sienjam ka Sorkar Pdeng kaba thmu ban pynkhlaiñ ïa ka jingpynroi ha ka liang ki jingtei ha ki Jylla.
U la pynpaw ruh ïa ki jingpyrshang kiba ïar jong ka Sorkar ban pynbha ïa ki jingtei ha kylleng ki bynta ba kongsan.
“Ka jingsynshar jong ngi ka la pynleit jingmut ha kaba pynkhlaiñ ïa ki jingtei ha nongkyndong, kynthup ha ka koit ka khiah bad ka pule-puthi, ban wanrah ïa ka roi ka par kaba kyllum lang ha Meghalaya”, u la bynrap.
Na ka liang u Myntri Rangbah, u la kyntu ruh ïa ki nongshong shnong ban pynrung kyrteng na bynta u ‘Aadhaar’, da kaba ban jur halor ka jingdonkam na bynta ban pyntreikam ïa ki skhim bapher-bapher ka Sorkar Pdeng.
“Ka Meghalaya ka dang ïai bteng ban long kawei na kiba duna tam ha ka jingpynrung kyrteng ‘Aadhaar’ ha ka ri. Khnang ban pyntikna ïa ka jingkhuid-jingsuba, ka jingtreikam kaba paka, bad ka jingkitkhlieh ha kaba pynpoi ïa ki skhim Sorkar, la pynlong kongsan ïa ka jingpynïasoh ‘Aadhaar’. Ngi kyntu ïa baroh ki nongshong shnong ban wan shakhmat bad pyndep ïa ka jingpynrung kyrteng jong ki,” u la ong.
Shuh shuh la khmih lynti ba kine ki Complex ba dang shu plie thymmai kin pynbha shi kat dei ïa ka jingtreikam ha ka liang ka jingsynshar, ban pynbha ïa ka jinglah jong ki paidbah ban ïoh ïa ki jingshakri kiba donkam, bad ban pynbiang ïa ka jaka trei kaba kham biang na ka bynta ki nongtrei Sorkar.
